პორტუგალიამ სომხეთი გაანადგურა და მსოფლიო ჩემპიონატზე გავიდა

2026 წლის მსოფლიო ჩემპიონატის საკვალიფიკაციო ეტაპის ბოლო ტურში პორტუგალიის ნაკრებმა სომხეთს უმასპინძლა.

ირლანდიასთან მიღებული წითელი ბარათის გამო დღევანდელი მატჩი კრიშტიანუ რონალდუმ გამოტოვა, რობერტო მარტინესის გუნდმა კი მეტოქე 9-1 გაანადგურა.

ანგარიში მე-7 წუთზე რენატო ვეიგამ გახსნა, მე-18 წუთზე კი ედუარტ სპერციანმა ანგარიში გაათანაბრა, ამის შემდეგ კი პორტუგალიამ კიდევ 8 უპასუხო გოლის გატანა შეძლო.

28-ე წუთზე მასპინძლები წინ გონსალუ რამოშმა გაიყვანა. 30-ე და 41-ე წუთებზე გატანილი გოლებით ჟოაო ნევეშმა დუბლი შეასრულა, ტაიმის ბოლოს კი პენალტი ზუსტად ბრუნო ფერნანდეშმა შეასრულა და პირველი ტაიმის ანგარიში (5-1) დააფიქსირა.

51-ე და 72-ე წუთზე მანჩესტერ იუნაიტედის ნახევარმცველმა კიდევ 2 გოლის გატანა შეძლო და ჰეთ-თრიქი შეასრულა, 81-ე წუთზე თავისთვის მე-3 გოლი ჟოაო ნევეშმაც გაიტანა, კომპენსირებულ დროში კი ანგარიში 9-1 ფრანსისკუ კონსეისაუმ გახადა.

პორტუგალიამ ჯგუფური ეტაპი 6 მატჩში მოპოვებული 13 ქულით დაასრულა, გაიტანა 20 და გაუშვა 7 გოლი, ამ შედეგით კი მსოფლიო ჩემპიონატის საგზური ოფიციალურად მოიპოვა.

ჯგუფში მეორე ადგილზე ირლანდია გავიდა, რომელმაც პარალელურად უნგრეთი 2-3 დაამარცხა და პლეიოფში გავიდა.