პრემიერ ლიგის საუკეთესო ტრანსფერი ცნობილია

მანჩესტერ იუნაიტედმა სეზონი კიდევ ერთი პრესტიჟული ჯილდოთი აღნიშნა.

ბრუნო ფერნანდეშის მიერ სეზონის საუკეთესო ფეხბურთელის ტიტულის მოპოვების შემდეგ კლუბმა კიდევ ერთი ნომინაცია დაისაკუთრა.

პრემიერ ლიგამ სეზონის საუკეთესო ტრანსფერად მანჩესტერ იუნაიტედის 23 წლის ბელგიელი მეკარე, სენე ლამენსი დაასახელა.

ახალგაზრდა გოლკიპერმა, რომელიც გუნდს გასულ ზაფხულს ანტვერპენიდან 18.1 მილიონად შეუერთდა, ანდრე ონანას ადგილი დაიკავა და ოლდ ტრაფორდზე ნამდვილ კედლად იქცა.

მან ჩატარებულ 32 შეხვედრაში 8 მშრალი მატჩი შემოგვთავაზა და ჯამში 79 სეივი შეასრულა, რითაც უდიდესი წვლილი შეიტანა გუნდის დაცვის ხაზის დასტაბილურებაში.

საუკეთესო შენაძენის ჯილდოზე რვაკაციანი სია იყო წარდგენილი, სადაც ლამენსმა არსენალის ფორვარდ ვიქტორ გიოკერეშსა და ჩელსის ჟოაო პედროს აჯობა. ნომინანტებს შორის ასევე იმყოფებოდნენ არსენალის ყოფილი კაპიტანი გრანიტ ჯაკა, რომელმაც სანდერლენდს სენსაციური მეშვიდე ადგილი და ევროპა ლიგის საგზური მოუპოვა, ადრიენ ტრუფერი ბორნმუთიდან, რაიან შერკი და ანტუან სემენიო მანჩესტერ სიტიდან, და დომინიკ კალვერტ-ლუინი ლიდს იუნაიტედიდან.

აღსანიშნავია, რომ არსენალის შენაძენმა, ვიქტორ გიოკერეშმა, პრემიერ ლიგის სადებიუტო სეზონში 36 მატჩში 14 გოლი გაიტანა, თუმცა ჯილდო მაინც მანჩესტერელთა მეკარეს დარჩა.

რაც შეეხება წლის მწვრთნელის ნომინაციას, აქ მანჩესტერ იუნაიტედის დამრიგებელი მაიკლ კერიკიც იყო წარდგენილი, თუმცა მან აღიარება არსენალის საჩემპიონო მწვრთნელს, მიკელ არტეტას დაუთმო.