მონტენეგროში ძიუდოს ევროპის ჩემპიონატის ბოლო დღეს გუნდური ასპარეზობა გაიმართა, ტურნირი კი საქართველოს ნაკრების ტრიუმფით დასრულდა და ჩვენი გუნდი ევროპის ჩემპიონი გახდა.
1/8 ფინალში ჩვენებმა აზერბაიჯანი 4-0 დაამარცხეს. გამარჯვება სოფიო სომხიშვილმა (+70), გურამ თუშიშვილმა (+90 კგ), ეთერ ლიპარტელიანმა (-57 კგ) და ლაშა შავდათუაშვილმა (-73 კგ) მოიპოვეს.
1/4 ფინალში ქართველებმა ავსტრიას აჯობეს 4-1 და 1/2 ფინალში გავიდნენ. ავსტრიელებთან თავიანთი შეხვედრები თუშიშვილმა, ლიპარტელიანმა, მარიამ ჭანტურიამ (-70 კგ) და ლუკა მაისურაძემ (-90 კგ) მოიგეს.
1/2 ფინალში საქართველოს ნაკრებმა გერმანიას მოუგო 4-0. თავი ლიპარტელიანმა, მიხეილ ბახბახაშვილმა (-73 კგ), ჭანტურიამ და მაისურაძემ გამოიჩინეს.
ფინალში მეტოქე იტალია იყო, რომელთანაც ჩვენებმა მძიმე ბრძოლაში მოიგეს. ანგარიში 1-3 იყო იტალიელთა სასარგებლოდ, თუმცა ქართველებმა მობილიზება მოახერხეს და ქამბექი შეასრულეს, საბოლოოდ კი 4-3 იმარჯვეს.
ფინალურ დაპირისპირებაში თავიანთი შეხვედრები მარიამ ჭანტურიამ, გურამ თუშიშვილმა და ეთერ ლიპარტელიანმა მოიგეს, გადამწყვეტი ქულა კი საქართველოს სოფიო სომხიშვილმა მოუპოვა.
საქართველოს ნაკრები ევროპის ჩემპიონატის გამარჯვებული შერეულ გუნდურ ასპარეზობაში მესამედ გახდა (2021, 2023, 2025).
შეგახსენებთ, რომ ინდივიდუალურ ჩათვლაში საქართველომ 2 ოქრო (გიორგი სარდალაშვილი, ილია სულამანიძე) და 2 ვერცხლი (ეთერ ლიპარტელიანი, ტატო გრიგალაშვილი) მოიპოვა.
