ყარაბაღმა სენსაცია ვეღარ მოახდინა, გალათასარიმ ბოდო/გლიმტს მოუგო

უეფას ჩემპიონთა ლიგის მე-3 ტურის მეორე სათამაშო დღეს ადრეული მატჩები გაიმართა.

ბილბაოს ატლეტიკმა სან მამესზე ყარაბაღი მიიღო, რომელმაც ლიგის პირველი ორი თამაში მოიგო.

შეხვედრაში ანგარიში პირველივე წუთზე გაიხსნა. სტუმრები ლეანდრო ანდრადემ დააწინაურა, თუმცა ამის მიუხედავად აზერბაიჯანულმა გუნდმა მორიგი სენსაცია ვეღარ მოახდინა. მე-40 წუთზე ანგარიში გორკა გურუსეტამ გაათანაბრა და პირველი ტაიმი ფრედ დასრულდა.

მეორე ტაიმის მეორე ნახევარში ბასკებმა გადამწყვეტი უპირატესობა მოიპოვეს. 70-ე წუთზე მასპინძლები წინ რობერტ ნავარომ გაიყვანა, 88-ე წუთზე კი გურუსეტამ დუბლი შეასრულა და მატჩს წერტილი დაუსვა (3-1).

ატლეტიკმა პირველ ორ ტურში მარცხის შემდეგ ლიგაზე პირველი 3 ქულა მოიპოვა, ყარაბაღს კი კვლავ 6 ქულა რჩება ანგარიშზე.

პარალელურ მატჩში გალათასარაიმ საკუთარ მოედანზე ბოდო/გლიმტს უმასპინძლა. ეს შეხვედრაც იმავე ანგარიშით დასრულდა (3-1).

აქაც ანგარიში სწრაფად გაიხსნა. მე-3 წუთზე მასპინძლები ვიქტორ ოსიმენმა დააწინაურა, რომელმაც 33-ე წუთზე დუბლი შეასრულა და სხვაობა ორამდე გაზარდა.

მე-60 წუთზე თავი იუნუს აქგიუნმაც გამოიჩინა და მატჩის ბედი გადაწყვიტა, 75-ე წუთზე ანდრეას ჰელმერსენმა პრესტიჟის გოლი გაიტანა და საბოლოო ანგარიში (3-1) დააფიქსირა.

თურქულმა გუნდმა პირველ ტურში მარცხის შემდეგ ორივე მატჩი მოიგო და 6 ქულა აქვს, ნორვეგიელებს კი 2 ქულა აქვთ.