-
Aa
+
ფონტის ზომა
უეფას ჩემპიონთა ლიგის მეოთხედფინალის ბლოკბასტერულ დაპირისპირებაში მოქმედი ჩემპიონი პსჟ ექვსგზის ევროპის ჩემპიონ ლივერპულს დაუპირისპირდება, რომელიც მძიმე მარცხის შემდეგ რეაბილიტაციას შეეცდება.
მატჩის სიახლეები და მიმდინარე ფორმა
პსჟ-მა პარასკევს ტულუზა 3-1 დაამარცხა და ლიგა 1-ის სათავეში ოთხქულიანი უპირატესობა გაიმყარა. ამ შაბათ-კვირას ლანსთან მნიშვნელოვანი მატჩის გადადება გუნდს საშუალებას აძლევს, სრულად კონცენტრირდეს ამ დაპირისპირებაზე.
ლუის ენრიკეს გუნდი ინგლისური კლუბის მეორედ ზედიზედ გამოთიშვას ეცდება, მას შემდეგ რაც მერვედფინალში ჩელსი ჯამში 8-2 გაანადგურა. პარიზელებმა ინგლისური გუნდები ბოლო სეზონის პლეი-ოფებიდან მოყოლებული ოთხჯერ გამოთიშეს, თუმცა ისტორიული სტატისტიკა მათ წინააღმდეგ მუშაობს - წინა სეზონის ჩემპიონი ბოლო ხუთიდან ოთხ შემთხვევაში მეოთხედფინალში გამოვარდა.
მიუხედავად ამისა, პსჟ ჩემპიონთა ლიგის ბოლო შვიდ პლეი-ოფ მატჩში დაუმარცხებელია (6 მოგება, 1 ფრე), რაც ფრანგული კლუბისთვის რეკორდამდე ერთი ნაბიჯია.
ლივერპულისთვის შაბათი კატასტროფული აღმოჩნდა - მათ ინგლისის ასოციაციის თასის მეოთხედფინალში მანჩესტერ სიტისთან 4-0 წააგეს. მთავარი მწვრთნელი არნე სლოტი იმედოვნებს, რომ გუნდი ზედიზედ მეორე მეოთხედფინალურ გამოვარდნას აიცილებს, მით უმეტეს, რომ ჩემპიონთა ლიგა ახლა მათი ერთადერთი შანსია ტიტულის მოსაგებად მოჰამედ სალაჰის ბოლო სეზონში.
ამ ტურნირზე ბოლო თამაშებმა გუნდს გარკვეული ოპტიმიზმი უნდა მისცეს - ლივერპულმა ბოლო ხუთიდან ოთხი მატჩი მოიგო (1 წაგება), ენფილდზე კი 4-0 გამარჯვებით გალათასარაი გამოთიშა.
თუმცა, ის ფაქტი, რომ ოთხივე გამარჯვება მშრალი ანგარიშით იყო, მიუთითებს, რამდენად მნიშვნელოვანია დაცვაში საიმედოობა, რაც რთული იქნება, რადგან სტუმრად ბოლო ხუთ მატჩში ოთხჯერ დამარცხდნენ (1 მოგება).
ურთიერთშეხვედრების ისტორია
გასულ სეზონში ამ ტურნირის მერვედფინალში მათი ორივე შეხვედრა სტუმარმა გუნდმა 1-0 მოიგო. პსჟ-მ ინგლისურ გუნდებთან ბოლო ექვსიდან ხუთი მატჩი მოიგო (1 ფრე).
სტატისტიკა და სერიები
პსჟ-ს ბოლო ექვსი საშინაო მატჩიდან ხუთში 3.5-ზე მეტი გოლი გავიდა.
პსჟ-მ ბოლო ხუთი ჩემპიონთალიგური მატჩიდან ოთხში პირველი ტაიმის დასრულებამდე გაიტანა.
ლივერპულმა ბოლო შვიდი გასვლითი მატჩიდან მხოლოდ ერთში გაიტანა 2 ან მეტი გოლი.
ლივერპულის ბოლო 22 გასვლითი მატჩიდან ჩემპიონთა ლიგაზე არცერთი არ დასრულებულა ფრედ (16 მოგება, 6 წაგება).
მნიშვნელოვანი მოთამაშეები და დანაკლისები
მატჩი განსაკუთრებული იქნება ქართველი გულშემატკივრებისთვის, რადგან ჩემპიონთა ლიგის 1/4 ფინალში ქართული დუელი შედგება - ხვიჩა კვარაცხელია, რომელიც ამ ტურნირის მიმდინარე სეზონში 7 გოლითა და 4 საგოლე გადაცემით პარიზელთა საუკეთესო ბომბარდირია, გიორგი მამარდაშვილს დაუპირისპირდება, რომელიც ტრავმირებულ ალისონს ცვლის.
უსმან დემბელემ პარასკევს დუბლი გაიფორმა და გასულ სეზონში ლივერპულის წინააღმდეგაც გაიტანა - მისი ბოლო ოთხი ჩემპიონთა ლიგის გოლიდან სამი ინგლისური გუნდების წინააღმდეგ პირველ ტაიმში გავიდა. ლივერპულის საუკეთესო ბომბარდირი ამ სეზონში დომინიკ სობოსლაია (5 გოლი), რომელთაგან ბოლო სამი ანგარიშის გახსნის გოლი იყო.
პსჟ-ს ყველაზე მნიშვნელოვანი დანაკლისი ბრედლი ბარკოლაა. ლივერპული კი, როგორც უკვე ითქვა, ამ მატჩში ალისონის გარეშე იქნება, თუმცა იმედოვნებენ, რომ ალექსანდერ ისაკი სათადარიგოთა სკამზე დაბრუნდება.
სავარაუდო შემადგენლობები
პსჟ - საფონოვი; ჰაკიმი, მარკინიოსი, პაჩო, მენდეში; ზაირ-ემერი, ვიტინია, ნევეში; დუე, დემბელე, კვარაცხელია
ლივერპული - მამარდაშვილი; ფრიმპონგი, კონატე, ვან დაიკი, კერკეზი; გრავენბერხი, სობოსლაი, მაკ ალისტერი, ვირცი; სალაჰი, ეკიტიკე
ამ მეოთხედფინალურ დაპირისპირებაში ბარსელონა და ატლეტიკო დეკემბრის დასაწყისიდან მოყოლებული მეხუთედ შეხვდებიან ერთმანეთს და სულ რამდენიმე დღეში უკვე მეორედ ითამაშებენ.
მატჩის სიახლეები და მიმდინარე ფორმა
შაბათს ბარსელონას 2-1 გამარჯვებამ ატლეტიკოს წინააღმდეგ გუნდს ლა ლიგის სათავეში შვიდქულიანი უპირატესობა მოუტანა, რაც ტიტულის დაცვის კუთხით ზეწოლას ამცირებს, რადგან გუნდი ზედიზედ მეორე სეზონში ჩემპიონთა ლიგის ნახევარფინალში გასვლას ცდილობს.
ჰანსი ფლიკის გუნდმა ბოლო ცხრა მატჩიდან რვა მოიგო (1 ფრე) სამ სხვადასხვა ტურნირზე, რაც მოიცავს წინა ეტაპზე ნიუკასლის ჯამში 8-3 განადგურებას. ფლიკის დანიშვნის შემდეგ ბარსელონა ჩემპიონთა ლიგის საუკეთესო გამტანია (73 გოლი), თუმცა მიუხედავად იმისა, რომ გასულ სეზონში ეს ეტაპი გადალახეს, კატალონიელებმა ბოლო ცხრა მეოთხედფინალიდან ექვსში ვერ მოახერხეს წინსვლა.
ატლეტიკოს სეზონი ახლა მთლიანად თასებზეა დამოკიდებული - კოპა დელ რეის ფინალში ადგილი უკვე გაინაღდეს, თანაც ბარსელონას ორმატჩიან დაპირისპირებაში დამარცხებით. დიეგო სიმეონეს გუნდმა ბოლო ტიტული 2020/21 წლების ლა ლიგის მოგებით მოიპოვა და ამ მოლოდინის დასრულების შანსი ახლა სუსტად ჩანს, რადგან ყველა ტურნირზე ბოლო სამი მატჩი წააგეს - ასეთი ცუდი სერია მათ 2021 წლის დეკემბრის შემდეგ არ ჰქონიათ.
ბოლო ექვს გასვლით მატჩში ოთხი მარცხი და ხუთჯერ ზუსტად სამი გოლის გაშვება - მათ შორის ბარსელონასთან კოპა დელ რეიზე 3-0 წაგება - არ არის კარგი ნიშანი გუნდისთვის, რომელიც ჩემპიონთა ლიგის პლეი-ოფის ბოლო ექვს გასვლით მატჩში გამარჯვებას ვერ ახერხებს (1 ფრე, 5 წაგება).
ურთიერთშეხვედრების ისტორია
ატლეტიკომ ჩემპიონთა ლიგაზე ორივე წინა ურთიერთშეხვედრებიდან წარმატებით გაიარა ეტაპი - 2013/14 და 2015/16 წლების მეოთხედფინალებში. თუმცა ბოლო პერიოდში ბარსელონა აშკარად დომინირებს: ყველა ტურნირზე ბოლო 13 შეხვედრიდან 10 მოიგო (1 ფრე, 2 წაგება) და კამპ ნოუზე ბოლო 25 მატჩში დაუმარცხებელია ატლეტიკოსთან (17 მოგება, 8 ფრე), რაც 2006 წლის თებერვლიდან გრძელდება.
სტატისტიკა და სერიები
ბარსელონა ამ სეზონის ჩემპიონთა ლიგაზე მხოლოდ ორ მატჩში ლიდერობდა პირველი ტაიმის შემდეგ (ტაიმზე: 4 ფრე, 4 წაგება).
ბარსელონამ ბოლო ცხრა საშინაო მატჩიდან რვა მოიგო მინიმუმ 3-ბურთიანი სხვაობით.
ატლეტიკომ ამ სეზონში გაშვებული 24 გოლიდან 16 მეორე ტაიმში მიიღო.
ატლეტიკოს ჩემპიონთა ლიგის ბოლო 17 მატჩიდან 15-ში ორივე გუნდმა გაიტანა.
მნიშვნელოვანი მოთამაშეები და დანაკლისები
ბარსელონას ახალგაზრდა ვარსკვლავს ლამინ იამალს, კიდევ ერთი გოლში მონაწილეობა სჭირდება, რათა ერლინგ ჰოლანდს გადაასწროს და გახდეს ყველაზე ახალგაზრდა ფეხბურთელი, რომელმაც ჩემპიონთა ლიგის ერთ სეზონში 10 გოლში მიიღო უშუალო მონაწილეობა (5 გოლი, 4 საგოლე გადაცემა).
ატლეტიკოს ხულიან ალვარესი აგრძელებს მეორე ტურნირების სპეციალისტის სტატუსის გამართლებას - მისი ბოლო 11 საკლუბო გოლიდან რვა ჩემპიონთა ლიგაზე გავიდა, კიდევ ერთი კი კოპა დელ რეიზე ბარსელონას წინააღმდეგ.
ბარსელონა რაფინიასა და ფრენკი დე იონგის გარეშე იქნება, ხოლო რონალდ არაუხო შაბათის მატჩში ტრავმით გამოვიდა. იმავე შეხვედრაში ატლეტიკოს მეკარე იან ობლაკი არ თამაშობდა.
სავარაუდო შემადგენლობები
ბარსელონა - ჟოან გარსია; ერიკ გარსია, კუბარსი, მარტინი, კანსელუ; ოლმო, პედრი; იამალი, ფერმინი, რაშფორდი; ლევანდოვსკი
ატლეტიკო - მუსო; მოლინა, ლე ნორმანი, ჰანცკო, რუჯერი; სიმეონე, ლიორენტე, კოკე, ლუკმენი; გრიზმანი, ალვარესი
თაზო ჩარკვიანი
კომენტარები
