სიახლეები
სეტანტა
სპორტის გურუ
ქვიზები
3 დღის წინ · 0 წთ წასაკითხად
-
Aa
+
ფონტის ზომა
საქართველოს ნაკრებმა ვილი სანიოლის ხელში მნიშვნელოვან პროგრესს მიაღწია. ეროვნულმა გუნდმა 2024 წელს საოცარი შედეგი დააფიქსირა. მარტში გუნდი დამოუკიდებლობის ისტორიაში პირველად გავიდა დიდ საფეხბურთო ფორუმზე და ევრო 2024-ზეც სენსაციურად იასპარეზა. ეროვნულმა ნაკრებმა ჯგუფურ ეტაპზე პორტუგალია დაამარცხა და ისტორიულ ევროპის ჩემპიონატზე პლეიოფში გავიდა.
მნიშვნელოვანი იყო, რომ ვილი სანიოლის გუნდის ზღაპარი გერმანიაში არ დასრულებულიყო და ნაკრებს ევროპის ჩემპიონატის შემდეგაც გაეგრძელებინა წინსვლა, რაც გუნდს ერთა ლიგის ახალ გათამაშებაში უნდა დაემტკიცებინა.
სექტემბრის სანაკრებო პაუზაზე საქართველომ ერთა ლიგა შთამბეჭდავად დაიწყო. ჩვენებმა თბილისში ჩეხეთი 4-1 გაანადგურეს, გასვლაზე კი ალბანეთს 0-1 სძლიეს და 6 ქულით ჯგუფს სათავეში ჩაუდგნენ.
მოვიდა ოქტომბერიც და სანიოლის გუნდმა ორივე თამაში წააგო, ორივე მინიმალური ანგარიშით, ჯერ უკრაინასთან, მერე ალბანეთთან. ამ ორი მარცხის მიზეზად ბევრი არგუმენტის მოყვანა შეიძლება, დაწყებული პირველ მატჩში მოედნის საფარიდან, დამთავრებული მეორე შეხვედრაში ფორმაციის ცვლილებისა.
ყურადღება ამ უკანასკნელ საკითხზე შევაჩეროთ. ალბანეთთან თამაშისთვის ფორმაციის შეცვლა ვილი სანიოლს გიორგი ქოჩორაშვილის არყოფნამ აიძულა, რომელმაც მატჩი დისკვალიფიკაციის გამო გამოტოვა.
ფრანგმა სპეციალისტმა ნახევარმცველი პირდაპირი შემცვლელით ვერ ჩაანაცვლა და ამის გამო სასტარტო შემადგენლობაში სიახლის შეტანა მოუწია. გუნდის ფორმაციაში შემტევ მოთამაშეთა სიმრავლე შეიმჩნეოდა, დაცვას ერთი მოთამაშე მოაკლდა და ნახევარდაცვის ცენტრშიც ქოჩორაშვილის არყოფნაში, შავი სამუშაოს შესრულება უფრო მეტად კისერზე ოთარ კიტეიშვილს დააწვა.
ალბანეთთან მარცხის შემდეგ აღნიშნულზე კომენტარი თავად სანიოლმაც გააკეთა.
"ამ დროისთვის, საქართველოში ქოჩორაშვილის მსგავსი ფეხბურთელი არ გვყავს, რომელიც მის პოზიციაზე ასეთ დონეზე ითამაშებს. ტაქტიკის ცვლილება ნაწილობრივ ქოჩორაშვილის დისკვალიფიკაციის გამო მოგვიწია. თუმცა ეს არ ნიშნავს, რომ მის არყოფნაში ფეხბურთის თამაში არ შეგვიძლია."
რა თქმა უნდა, ნაკრებს ნებისმიერის გარეშე შეუძლია ფეხბურთის თამაში, თუმცა ალბანეთთან მატჩში ცხადი იყო, რომ გუნდს ქოჩორაშვილი ცალსახად აკლდა. ეს არ ნიშნავს, რომ გიორგისთან ერთად აუცილებლად სხვა შედეგი დაფიქსირდებოდა, თუმცა მომენტებში ქოჩორას არყოფნა მოედანზე აშკარად იგრძნობოდა.
უნდა აღვნიშნოთ გიორგი მიქაუტაძის სიტუაციაც, რომელიც ევრო 2024-ის თანაბომბარდირი გახდა. მისი დიდებული თამაში გერმანიის სტადიონებზე ქართველ და არამარტო ქართველ გულშემატკივრებს ყოველთვის გვემახსოვრება.
ზაფხულის სატრანსფერო ფანჯარაზე გიორგიმ ოცნება აისრულა და მშობლიურ ლიონში გადავიდა, სადაც იმედი გვქონდა, რომ კარგ თამაშს გააგრძელებდა, თუმცა მისი ადაპტაცია ოლიმპიკში გაიწელა. გუნდმაც სეზონი არადამაჯერებლად დაიწყო და თავად გიორგის თამაშიც ჯერ-ჯერობით ფრანგული გუნდის გულშემატკივრებში აღფრთოვანებას ვერ იწვევს.
მიქაუტაძემ სექტემბრის სანაკრებო პაუზაზე ჩეხეთის წინააღმდეგ თავი გამოჩინა, თუმცა ოქტომბერში სათამაშო პრაქტიკის არქონამ თავი მეტად იჩინა, იქნებ ფორმაში მყოფ გიორგის ალბანეთთან თავისი მომენტი გამოეყენებინა.
სანიოლმა კომენტარი მასზეც გააკეთა.
"გიორგი მიქაუტაძეს რთული პერიოდი აქვს კლუბში. აკლია თავდაჯერება, რადგან ფეხბურთელისთვის მნიშვნელოვანია თამაში. ვცდილობთ, რომ მივცეთ ის, რაც აკლია, სათამაშო დრო, თავდაჯერება, რადგან მან ბევრი რამ გააკეთა ნაკრებისთვის. ვფიქრობ, რომ მიქაუტაძეს კლუბში მეტი სათამაშო პრაქტიკა რომ ჰქონოდა, უკრაინასთან და ალბანეთთან მატჩების შედეგებზეც აისახებოდა".
ოქტომბერში საქართველოს ნაკრების შედეგებს კონკრეტულად ქოჩორაშვილის არყოფნას ან მიქაუტაძის შედარებით არადამაჯერებელ თამაშს არ ვაბრალებთ, თუმცა განსაკუთრებით ალბანეთთან შესამჩნევი გახდა, რომ გუნდში აქამდე არსებული ჰარმონია დაირღვა.
ზემოთ აღნიშნულ წარმატებულ შედეგებს თუ გავიხსენებთ, ვნახავთ, რომ მათ საერთო აქვთ - ფორმაცია და შემადგენლობა, რომელსაც ვილი სანიოლმა მიაგნო.
მარტში ევროპის ჩემპიონატის შესარჩევი პლეიოფიდან მოყოლებული სანიოლის გონებაში ის ტაქტიკური მონახაზი და დაახლოებითი სასტარტო თერთმეტეული ჩამოყალიბდა, რომელსაც ის გადამწყვეტ მატჩებში ენდობოდა - მათ შორის აღსანიშნავია ნახევარდაცვის რგოლი, რომელიც საოცარ ტრიოდ ჩამოყალიბდა - ქოჩორაშვილი, კიტეიშვილი, ჩაკვეტაძე.
მარტში ლუქსემბურგთან მატჩიდან ოქტომბერში ალბანეთთან შეხვედრის ჩათვლით საქართველოს ნაკრებმა 10 ოფიციალური მატჩი ჩაატარა.
აქედან ქოჩორა-კიტე-ჩაკვეს ტრიოთი გუნდმა 7 შეხვედრა ითამაშა, საიდანაც 4 მოიგო (ლუქსემბურგი, პორტუგალია, ჩეხეთი, ალბანეთი), 1 ფრედ დაასრულა (საბერძნეთი) და 2 წააგო (ესპანეთი, უკრაინა). ფაქტია, რომ ესპანეთთანაც გუნდი კიტეიშვილის იძულებით გასვლამდე არ აგებდა (არ ვამბობთ, რომ მაინც არ წავაგებდით).
აღნიშნული ტრიო კი ამ პერიოდში სასტარტო შემადგენლობაში 3-ჯერ არ იყო, საქართველოს ნაკრებმა ვერცერთი თამაში ვერ მოიგო - 2 მარცხი (თურქეთი, ალბანეთი), 1 ფრე (ჩეხეთი).
აღსანიშნავია ევრო 2024-ზე გიორგი მიქაუტაძის ტრიუმფიც. ბომბარდირმა სანაკრებო ფორუმზე 3 გოლის გატანა შეძლო და ოქროს ბუციც დაიმსახურა.
და ბოლოს, რისი თქმა გვსურს - საქართველოს ნაკრებისთვის 2024 წელი ისტორიული აღმოჩნდა და ეროვნულმა გუნდმა ათწლეულების ნანატრ მიზანს მიაღწია, ეროვნულ გუნდს სულ ახლო წარსულისგან განსხვავებით ჰყავს ფეხბურთელები, რომელთაც სათამაშო პრაქტიკაც აქვთ და ტოპ ევროპულ ჩემპიონატებშიც თამაშობენ, თუმცა მაინც გვაქვს თავის ტკივილი.
ვილი სანიოლმა წარმატებას ნაკრებში ჰარმონიის მიღწევითა და იმ ზუსტი და კონკრეტული ტიპის მოთამაშეთა პოვნით მიაღწია, რომელთა არყოფნაშიც გუნდში არსებული ჰარმონია ირღვევა და ნაკრები შესაბამის შედეგს ვეღარ აფიქსირებს.
სანიოლიც საფიქრალიც ახლა წესით ეს არის, რომ ისტორიული წარმატების შემდეგ თითო მოთამაშის დისკვალიფიკაციამ, ტრავმამ თუ კლუბში უთამაშებლობამ გუნდის შედეგსა და თამაშის ხარისხზე მნიშვნელოვანი გავლენა აღარ მოახდინოს.
ფოტოები: ეროვნული ნაკრები
თ
თაზო ჩარკვიანი
კომენტარები