რამაზ სვანაძე, რომელიც 1981 წლის 2 მარტს დაიბადა, ყოფილი ფეხბურთელი და მწვრთნელია, რომელიც საქართველოს ეროვნული ნაკრების მთავარ მწვრთნელად დაინიშნა.
სვანაძე რამდენიმე ქართულ კლუბში თამაშობდა (სტუ თბილისი, დინამო თბილისი, სიონი ბოლნისი, კოლხეთი ფოთი, ლოკომოტივი თბილისი), თუმცა ტრავმის გამო 2005 წელს, 24 წლის ასაკში, საფეხბურთო კარიერის დასრულება მოუწია.
მისი სამწვრთნელო კარიერის პირველი ეტაპი თბილისის დინამოს უკავშირდება, სადაც 2 წლის განმავლობაში მუშაობდა. სვანაძე მალხაზ ჟვანიასა და მიხალ ბილეკის სამწვრთნელო შტაბებში ასისტენტის როლს ასრულებდა.
2019 წლის 1 მარტს სვანაძე საქართველოს 19-წლამდელთა ნაკრების მთავარ მწვრთნელად დაინიშნა. მისმა გუნდმა 2020 წლის ევროპის U19 ჩემპიონატის საკვალიფიკაციო ეტაპზე სამივე მეტოქე (ხორვატია, უნგრეთი და ყაზახეთი) დაამარცხა და მომდევნო ეტაპზე გავიდა, თუმცა COVID-19-ის პანდემიის გამო ტურნირი შეჩერდა.
2021 წლის თებერვალში სვანაძემ საქართველოს 21-წლამდელთა ნაკრები ჩაიბარა, რომელსაც ევროპის ჩემპიონატზე პირველად მასპინძლის რანგში უნდა ეთამაშა.
მისი ხელმძღვანელობით გუნდმა 2023 წლის ევროპის U21 ჩემპიონატის ჯგუფში, სადაც პორტუგალიის, ნიდერლანდებისა და ბელგიის ნაკრებებს დაუპირისპირდა, პირველი ადგილი დაიკავა და მეოთხედფინალში გავიდა, სადაც ისრაელთან პენალტების სერიაში დამარცხდა.
ამ ტურნირის შემდეგ რამაზ სვანაძემ U21 ნაკრების გაწვრთნა გააგრძელა და გუნდი ევროპის ჩემპიონატზე კვლავ გაიყვანა, ამჯერად საკვალიფიკაციო ეტაპის გავლით, სადაც გადამწყვეტ მატჩში ხორვატიის ნაკრები პენალტების სერიაში დავამარცხეთ.
2025 წლის ევროპის ჩემპიონატზე კი სვანაძის გუნდი ჯგუფში პორტუგალიასთან, საფრანგეთთან და პოლონეთთან მოხვდა, სადაც პოლონეთთან მოპოვებული 3 ქულით მე-3 ადგილი დაიკავა.
სვანაძე საქართველოს ეროვნული ნაკრების მთავარი მწვრთნელის მოვალეობის შემსრულებელიც იყო მას შემდეგ, რაც სლოვაკმა სპეციალისტმა ვლადიმირ ვაისმა თანამდებობა დატოვა.
მან ეროვნულ გუნდს 2020 წლის 18 ნოემბერს, უეფას ერთა ლიგის ბოლო შეხვედრაში, ესტონეთის წინააღმდეგ უხელმძღვანელა. მატჩი ფრედ, 0:0 დასრულდა.
