ლი შარპმა მაიკლ კერიკს მოუწოდა, რომ მანჩესტერ იუნაიტედში სერ ალექს ფერგიუსონის „შიშის ფაქტორზე“ დაფუძნებული ტაქტიკა გამოიყენოს. ყოფილი გარემარბი მიიჩნევს, რომ დროებითმა მწვრთნელმა ლიდს იუნაიტედთან იმედგაცრუების შემდეგ მეტი აგრესია უნდა გამოავლინოს.
შარპის თქმით, კერიკმა თავისი შინაგანი ფერგიუსონი უნდა იპოვოს, რათა იუნაიტედის არასტაბილური შემადგენლობისგან მაქსიმუმი მიიღოს. მიუხედავად იმისა, რომ კერიკმა მუშაობა კარგად დაიწყო, საკუთარ მოედანზე ლიდსთან განცდილმა მარცხმა (1:2) გუნდის მენტალიტეტთან დაკავშირებით კითხვები გააჩინა.
ლი შარპი მიიჩნევს, რომ რუბენ ამორიმის წასვლის შემდეგ კერიკის მშვიდი ბუნება გუნდისთვის სუფთა ჰაერივით იყო, თუმცა ახლა ფეხბურთელებს უფრო მკაცრი მიდგომა სჭირდებათ.
შარპის თქმით, კერიკისნაირ მწვრთნელსაც კი უნდა შეეძლოს ფეხბურთელების დაშინება, როცა მათი თამაშის დონე ეცემა.
ლი შარპი აცხადებს:
მაიკლ კერიკი და სერ ალექს ფერგიუსონი პიროვნულად რადიკალურად განსხვავდებიან. კერიკი ძალიან მშვიდია. ფეხბურთელები უკვე საუბრობდნენ მის მიდგომებზე. მოსვლისთანავე მან თითოეულ მათგანს მხარდაჭერა გამოუცხადა და მათი ძლიერი მხარეები გამოკვეთა.
ის კლასით გამორჩეული იყო როგორც მოედანზე, ისე მის მიღმა და ასეთივეა სამწვრთნელო კარიერაშიც. სერ ალექსი სრულიად სხვაგვარი იყო. ის მოდიოდა და ყველას სიკვდილამდე აშინებდა, რის გამოც აგრესიული გუნდი ჰყავდა. ფერგიუსონი ყველას აკონტროლებდა და სწორედ ამან მოიტანა წარმატება.
