პოლ პოგბამ, რომელიც ამჟამად მონაკოს ფეხბურთელია, რიო ფერდინანდის პოდკასტში მანჩესტერ იუნაიტედში გატარებული პერიოდი გაიხსენა და ჟოზე მოურინიოსთან დაპირისპირების რეალური მიზეზები დაასახელა.
33 წლის ფრანგი ნახევარმცველის თქმით, მათი „განქორწინება“ ტრავმებთან დაკავშირებულმა მუდმივმა კითხვებმა და ერთმა საბედისწერო ფოტომ გამოიწვია.
პოგბა მანჩესტერ იუნაიტედში 2016 წელს, 100 მილიონ ევროზე მეტად შეფასებული ტრანსფერით დაბრუნდა. მისი თქმით, თავიდან პორტუგალიელ სპეციალისტთან იდეალური ურთიერთობა ჰქონდა:
თავიდან ყველაფერი კარგად იყო, ერთმანეთს მესიჯებსაც ვწერდით. ის მართლაც სასაცილო და განსაკუთრებული პიროვნებაა. თუმცა, ვფიქრობ, ტრავმებმა ჩვენს შორის დისტანცია გააჩინა. მედია მუდმივად ჩემზე ეკითხებოდა, რამაც ალბათ გააღიზიანა. სულ პოლი, პოლი, პოლი... ამან ყველაფერი გააფუჭა
ურთიერთობა საბოლოოდ მაშინ დაიძაბა, როდესაც პოგბა რეაბილიტაციის კურსს მაიამიში გადიოდა. პაპარაციმ ფეხბურთელსა და მის მეუღლეს, ზულაის, ფოტო გადაუღო, რომელიც მოურინიომ პოგბას მაშინდელ აგენტს, მინო რაიოლას გადაუგზავნა. ამით ეჭვქვეშ დააყენა ის, თუ რამდენად სერიოზულად ეკიდებოდა ფეხბურთელი მკურნალობის პროცესს.
მაიამიში სარეაბილიტაციოდ წავედი. პაპარაციმ მე და ჩემს ცოლს ფოტო გადაგვიღო, ჟოზემ კი ეს სურათი მინოს გაუგზავნა. ეს საერთოდ არ მომეწონა. ის ამბობდა, თითქოს შვებულებაში ვიყავი, როცა ჩვენ იქ თავდაუზოგავად ვვარჯიშობდით. მოურინიოს ვუთხარი: ''მართლა? მე ტრავმა მაქვს და დღეში სამჯერ ვვარჯიშობ. შენი აზრით, ვინ ვარ?'' ეს იყო პირველი შემთხვევა, როცა მწვრთნელთან პრობლემა შემექმნა
ამ ინციდენტის შემდეგ ვითარება კიდევ უფრო დამძიმდა. მოურინიომ პოგბას ვიცე-კაპიტნის სამკლაური ჩამოართვა, სარკასტულად აკრიტიკებდა მის თამაშს და ერთხელ ვირუსიც კი უწოდა. მათი დაპირისპირება პიკს სავარჯიშო მოედანზე მიაღწია, რაც კამერებმაც დააფიქსირეს. საბოლოოდ, პოგბამ მანჩესტერ იუნაიტედი 2022 წელს თავისუფალი აგენტის სტატუსით დატოვა.
