ლივერპულის თავდამსხმელს, 23 წლის უგო ეკიტიკეს ოპერაცია ჩაუტარდა მას შემდეგ, რაც 14 აპრილს, სამშაბათს, ჩემპიონთა ლიგიდან პსჟ-სთან გამოთიშვის მატჩში მარჯვენა აქილევსის მყესი გაიწყვიტა.
ლივერპულის წყევლა: ეკიტიკე ენფილდიდან საკაცით გაიყვანეს
L’Equipe-ის ინფორმაციით, საფრანგეთის ნაკრების ფეხბურთელს ოპერაცია ხუთი დღის წინ, შაბათს, 18 აპრილს, ლონდონში ჩაუტარდა იმ სამედიცინო გუნდის მიერ, რომელსაც ლივერპულის ფეხბურთელებთან მუშაობის დიდი გამოცდილება აქვს.
გამოცემა დასძენს, რომ სამედიცინო პროცედურას დისტანციურად ზედამხედველობდა ის ქირურგი, რომელმაც ოპერაცია ბოსტონ სელტიქსის ფორვარდს, ჯეისონ ტეიტუმს გაუკეთა (ამ უკანასკნელმა მსგავსი ტრავმა ერთი წლის წინ მიიღო).
მოსალოდნელია, რომ ეკიტიკე მოედანს 2026-2027 წლების სეზონის მეორე ნახევარში დაუბრუნდება. მსგავსი ტრავმის დროს აღდგენითი პერიოდი, როგორც წესი, რვიდან ათ თვემდე გრძელდება.
