მანჩესტერ სიტის ნახევარმცველმა, როდრიმ, საფეხბურთო კალენდრის მიმართ მკაცრი პროტესტი გამოთქვა და თავის პროფესიულ მომავალზე საგანგაშო პროგნოზი გააკეთა.
ოქროს ბურთის მფლობელმა აღიარა, რომ თუ თამაშების რაოდენობა არ შემცირდება, ის იძულებული გახდება ელიტარულ დონეზე თამაში 32 წლის ასაკში შეწყვიტოს. ეს განცხადება ესპანელმა მორიგი ტრავმის ფონზე გააკეთა.
29 წლის ფეხბურთელი მიიჩნევს, რომ შიდა ჩემპიონატებისა და საერთაშორისო ტურნირების გადატვირთული გრაფიკი ადამიანის ორგანიზმისთვის გაუსაძლისი ხდება. როდრისთვის, რომელიც როგორც კლუბის, ისე ნაკრების შეუცვლელი ფიგურაა, ფიზიკური დატვირთვა კარიერის ნაადრევად დასრულების მთავარ საფრთხედ იქცა. მან DAZN-ის ეთერში საუბრისას არ დაუმალავს, რომ ცვლილებები აუცილებელია:
ან გავჩერდებით, ან 32 წლამდე ვერ მივაღწევ. უნდა იცოდე, როგორ გადაანაწილო ძალები, რადგან სხეულს თავისი ლიმიტები აქვს და ჩვენ ყველას გვაქვს ვადის გასვლის თარიღი
ფიზიკურ დაღლილობასთან ერთად, როდრიმ ხაზი გაუსვა ფსიქოლოგიურ წნეხსაც, რასაც ბოლო ხუთი წლის განმავლობაში ყველა ტურნირის ფინალურ ეტაპზე თამაში იწვევს. ევრო 2024-ზე გამარჯვების შემდეგ, ნახევარმცველმა აღიარა, რომ თავს სრულიად გამოფიტულად გრძნობდა და მომდევნო სეზონებისთვის მოტივაციის პოვნა გაუჭირდა:
როდესაც ევროპის ჩემპიონატი დასრულდა, უკიდურესად გამოფიტული ვიყავი. ზედიზედ 5-6 წელია ყველაფრის ფინალურ ეტაპზე გავდივარ. ფიზიკურზე მეტად, მენტალურად არ ვიცოდი, როგორ შევხვედროდი მომდევნო წლებს ამ გადაწვის გამო. მივაღწიე პიკს, მაქსიმუმს და ეს დრო ენერგიის აღსადგენად გამოვიყენე
ამჟამად როდრი რეაბილიტაციის პროცესს გადის და ცდილობს მოედანს საუკეთესო ფორმაში დაუბრუნდეს. მიუხედავად სისტემის მიმართ უკმაყოფილებისა, მისი მთავარი მიზანი მსოფლიო ჩემპიონატზე ესპანეთის ნაკრების გაძღოლაა. მანჩესტერ სიტის სამედიცინო შტაბი მის მდგომარეობას ყურადღებით აკვირდება, რათა ვარსკვლავის დაბრუნება ფრთხილად და უსაფრთხოდ მოხდეს.
