არსენალის მცველს, გაბრიელ , მას ძალიან გაუმართლა, რომ მანჩესტერ სიტის თავდამსხმელთან, ერლინგ ჰალანდთან დაპირისპირებისას მოედნიდან არ გააძევეს. ინციდენტი მატჩის მეორე ტაიმში მოხდა.
სიტი 2:1-ს იგებდა, როცა ფეხბურთელთა შორის შელაპარაკება დაიწყო. ისინი ერთმანეთს თავებით მიებჯინნენ, რა დროსაც გაბრიელი ჰალანდს მიაწვა. მსაჯმა ორივე მოთამაშეს ყვითელი ბარათი უჩვენა.
Sky Sports-ის ეთერში გარი ნევილმა ამ გადაწყვეტილების გამო გაოცება ვერ დამალა:
ეს რატომ გააკეთე, გაბრიელ?! ერთმანეთზე თავების მიბჯენა შეიძლება, მაგრამ როგორც კი თავს უკან გადახრი და წინ გამოსწევ, ეს ჩვეულებრივ წითელი ბარათია. სიმართლე გითხრათ, არ მჯერა, რომ არ გააძევეს.
პრემიერ ლიგის ყოფილმა მსაჯმა, მაიკ დინმა დასძინა:
გაბრიელის მხრიდან არ ყოფილა გადამეტებული ძალა, მაგრამ მან თავისი თავი მეტოქისკენ ცოტა უფრო მეტად წამოსწია. მატჩის მიმდინარეობიდან გამომდინარე, ყვითელი ბარათი ალბათ სწორი გადაწყვეტილებაა, თუმცა არ გამიკვირდებოდა, გაბრიელი რომ გაეძევებინათ. მას ძალიან გაუმართლა.
ინციდენტი ვიდეო რეფერიმაც გადაამოწმა და დაასკვნა, რომ ყვითელი ბარათი სწორი გადაწყვეტილება იყო. პრემიერ ლიგის ოფიციალურ განმარტებაში ნათქვამია: „მსაჯის გადაწყვეტილება წითელი ბარათის არჩვენების შესახებ VAR-მა დაადასტურა. გაბრიელის ქმედება ზედმეტად აგრესიულად ან ძალადობრივად არ იქნა მიჩნეული.“
