მადრიდის რეალი 2023 წლის შემდეგ პირველად იქნება წარმოდგენილი ოქროს ბურთის დაჯილდოების ცერემონიაზე, რომელიც დღეს საღამოს გაიმართება.
მადრიდულმა კლუბმა ბოლო 2 წლის განმავლობაში დაჯილდოების ცერემონიას ბოიკოტი გამოუცხადა, რაც 2024 წელს ვინისიუს ჟუნიორისთვის ოქროს ბურთის არმინიჭებას მოჰყვა.
ბრაზილიელმა ფეხბურთელმა 1129 ქულა დააგროვა და მცირედით ჩამორჩა გამარჯვებულ როდრის, რომელმაც 1170 ქულა მიიღო.
იმ პერიოდში კლუბთან დაახლოებული წყაროები ამტკიცებდნენ, რომ ვინისიუსს, რომელმაც რეალთან ერთად ჩემპიონთა ლიგა და ლა ლიგა მოიგო, ჯილდო თავად ოქროს ბურთის კრიტერიუმების მიხედვით ეკუთვნოდა.
მათი აზრით, თუ გამარჯვებული ვინისიუსი არ გახდებოდა, ჯილდო დანი კარვახალს უნდა მიეღო.
მადრიდულმა კლუბმა ოქროს ბურთის ორგანიზატორები UEFA-სთან ზედმეტად მჭიდრო კავშირშიც დაადანაშაულა. ეს ყველაფერი იმ ფონზე ხდებოდა, როდესაც რეალსა და ევროპული ფეხბურთის მმართველ ორგანიზაციას შორის ურთიერთობა დაძაბული იყო.
დაპირისპირების მიზეზი მადრიდული კლუბის მხარდაჭერა გახლდათ ევროპული სუპერლიგის პროექტის მიმართ, რომელიც 2021 წელს შეიქმნა.
რეალმა მაშინ მკაფიოდ განაცხადა, რომ არ დაესწრებოდა ისეთ ღონისძიებებს, სადაც, მათი აზრით, კლუბის მიმართ სათანადო პატივისცემას არ იჩენდნენ.
წლევანდელი დაჯილდოების ცერემონია რეალსა და UEFA-ს შორის ურთიერთობების დათბობის ფონზე გაიმართება, რაც სუპერლიგის პროექტის დასრულებას მოჰყვა.
ამასთან, მადრიდულ კლუბს ოქროს ბურთის მოგების ერთ-ერთი მთავარი ფავორიტიც ჰყავს - კილიან მბაპე, რომელიც დაჯილდოების ცერემონიაზე დასასწრებად ლონდონში მიემგზავრება.
კლუბს ასევე წარმოადგენენ ინსტიტუციურ ურთიერთობათა დირექტორი და კლუბის ელჩი ემილიო ბუტრაგენიო, აგრეთვე მარკ კუკურელია, რომელიც ოქროს ბურთის ნომინანტთა შორისაა.
იან დიომანდე და ფელისია შრიოდერი კი კოპას ჯილდოზე არიან წარდგენილნი, რომელიც წლის საუკეთესო ახალგაზრდა მამაკაც და ქალ ფეხბურთელებს გადაეცემათ.
თუმცა, მადრიდის რეალის პრეზიდენტი ფლორენტინო პერესი დღევანდელ დაჯილდოების ცერემონიას არ დაესწრება.
