რეკორდები, რომელთა დამხობაც მესის და რონალდუს მუნდიალზე შეუძლიათ

2026 წლის მსოფლიო ჩემპიონატზე ლიონელ მესი და კრიშტიანუ რონალდუ მორიგი ისტორიული რეკორდების დამხობისთვის ემზადებიან.

ჩრდილოეთ ამერიკაში დაგეგმილი ტურნირი, დიდი ალბათობით, ორივე ლეგენდისთვის ბოლო მუნდიალი იქნება.

აი, ის მთავარი მიღწევები, რომლებიც მათ შეუძლიათ ამ ზაფხულს გადაწერონ:

მე-6 მსოფლიო ჩემპიონატი

როგორც კი რომელიმე მათგანი მოედანზე ფეხს დაადგამს, ისტორიაში პირველი ფეხბურთელი გახდება, ვინც 6 სხვადასხვა მუნდიალზე ითამაშა. მესი ამ რეკორდს მინიმუმ 24 საათით მარტო დაისაკუთრებს, რადგან არგენტინა პორტუგალიაზე ერთი დღით ადრე იწყებს ასპარეზობას.

მსოფლიო ჩემპიონატის ბომბარდირი

მესის ანგარიშზე 13 გოლია და მიროსლავ კლოზეს ისტორიულ რეკორდამდე (16 გოლი) სულ რაღაც 3 ბურთი აშორებს. რონალდუს 8 გოლი აქვს და პლეი-ოფში საერთოდ არ გაუტანია, თუმცა ამ რეკორდისთვის ბრძოლაში კილიან მბაპეც (12 გოლი) ჩართულია.

საუკეთესო ასისტენტი

ოფიციალური მონაცემებით, რეკორდი პელეს ეკუთვნის 10 საგოლე გადაცემით. მესის ამ ნიშნულამდე მხოლოდ 2 ასისტი აკლია, რონალდუს კი მუნდიალებზე მხოლოდ 2 პასი აქვს გაკეთებული.

ყველაზე მეტი მატჩი

რეკორდი მესის ეკუთვნის (26 თამაში). რონალდუ მას 4 მატჩით ჩამორჩება, ასე რომ, პორტუგალიელის გალიდერება მხოლოდ არგენტინის ნაადრევი გამოვარდნისა და პორტუგალიის ფინალში გასვლის შემთხვევაშია შესაძლებელი.

ფინალის ასაკობრივი რეკორდები

თუ პორტუგალია ფინალში გავა, 41 წლის რონალდუ გახდება ყველაზე ასაკოვანი ფეხბურთელი, ვისაც მუნდიალის ფინალში უთამაშია (ამჟამინდელი რეკორდი დინო ძოფს ეკუთვნის - 40 წელი). ამასთანავე, მესისაც და რონალდუსაც შანსი აქვთ გახდნენ ფინალში გოლის გამტანი ყველაზე ასაკოვანი მოთამაშეები.