ლივერპულის ქართველი მეკარე გიორგი მამარდაშვილი პოლიციამ M6 ავტომაგისტრალზე მანქანის მართვისას ტელეფონში ვიდეოს ყურების გამო დააჯარიმა და აღნიშნული საქმე სასამართლოში განიხილეს.
25 წლის ფეხბურთელი პოლიციამ მას შემდეგ გააჩერა, რაც შენიშნეს, რომ Audi-ს მარკის ავტომობილის საჭესთან ტელეფონში იყურებოდა, რის შემდეგაც ის პოლიციის მანქანის უკანა სავარძელზე გადააჯინეს. საქართველოს ნაკრების მეკარე, რომელიც მერსისაიდულ გრანდს 2025 წელს შეუერთდა, დამნაშავედ იქნა ცნობილი გზაზე ტრანსპორტის მართვისას მობილური ტელეფონის გამოყენებაში.
ვორინგტონის გაერთიანებულ სასამართლოში გამართულ პროცესზე მას 440 ფუნტი სტერლინგის ოდენობით ჯარიმა დაეკისრა და მართვის მოწმობაზე 6 საჯარიმო ქულა გამოეწერა. გარდა ამისა, მას 120 ფუნტი სასამართლო ხარჯების და 176 ფუნტი დაზარალებულთა ფონდისთვის გადახდა დაევალა.
ჩეშირის პოლიციის ოფიცერმა, პატრულ-ინსპექტორმა რიმ თავის ჩვენებაში დეტალურად აღწერა, როგორ შეამჩნია ქართველი ფეხბურთელი 27 იანვარს, დაახლოებით დღის 15:45 საათზე, M6 ავტომაგისტრალის სამხრეთის მიმართულებით. ოფიცერი ყვება, რომ მესამე ზოლში მოძრაობისას შავ Audi-ს გაუსწრო, რომელიც მეორე ზოლში მიდიოდა, მაშინ როცა პირველი ზოლი სრულიად თავისუფალი იყო და წესით, ავტომობილს იქით უნდა გადაენაცვლა, რამაც მისი ყურადღება მიიპყრო.
"როდესაც გვერდით ჩავუარე, შევნიშნე, რომ მძღოლს ტელეფონი ხელში ეჭირა, საჭის ცენტრალურ ნაწილთან ახლოს. ის ეკრანზე რაღაცას უყურებდა, თანაც ამ დროს მაგისტრალისთვის დამახასიათებელი მაღალი სიჩქარით გადაადგილდებოდა," - წერს ოფიცერი.
როგორც კი უსაფრთხო სივრცე გამოჩნდა, პოლიციამ მანქანა გზის კიდეზე გააჩერებინა. მძღოლმა, რომელიც სალონში მარტო იმყოფებოდა, თავი გიორგი მამარდაშვილად წარადგინა და ქართული მართვის მოწმობაც აჩვენა. მთელი ეს პროცესი ოფიცრის სამხრე კამერამაც დააფიქსირა.
ფეხბურთელს პოლიციის უწყებაზე ოფიციალური პასუხი არ გაუცია, რის გამოც საქმე დახურულ რეჟიმში, წერილობითი მტკიცებულებების საფუძველზე განიხილეს და ის დამნაშავედ ცნეს.
ცნობისთვის, გასულ კვირას ინგლისსა და უელსში საჭესთან ტელეფონის გამოყენების გამო 247 მძღოლი დაჯარიმდა, ხოლო საერთო ჯარიმების თანხამ 41,000 ფუნტს გადააჭარბა.
