როდის ბრუნდება იამალი?

ესპანეთის ნაკრების მთავარმა მწვრთნელმა, ლუის დე ლა ფუენტემ, კაბო-ვერდესთან მატჩის წინ უმნიშვნელოვანესი სიახლე გააჟღერა და დაადასტურა, რომ ლამინ იამალი სრულ მზადყოფნაშია.

ბარსელონას ვარსკვლავმა სეზონის ბოლოს მძიმე ტრავმა მიიღო, რის გამოც მისი მუნდიალზე თამაში კითხვის ნიშნის ქვეშ იდგა, თუმცა მოზარდმა მოლოდინზე სწრაფად აღდგენა მოახერხა.

იამალი სათადარიგოა, მაგრამ სათამაშოდ მზადაა

მიუხედავად იმისა, რომ ჩემპიონატი ამერიკაში, დიდ სიცხეში ტარდება, დე ლა ფუენტემ ატლანტაში გამართულ პრესკონფერენციაზე ნერვიულობის საფუძველი გააქარწყლა.

კარგი ამბავი ისაა, რომ ლამინი იდეალურ კონდიციაშია. მან ზუსტად იმ ფორმაში მიაღწია ამ მომენტამდე, როგორშიც ჩვენ გვინდოდა. ისიც, ნიკო უილიამსიც და ვიქტორ მუნიოსიც კარგად არიან. სამივე მზადაა სათამაშოდ, თუმცა ზოგიერთი მათგანი მთელ შეხვედრას ვერ ჩაატარებს

სამწვრთნელო შტაბი სიფრთხილეს იჩენს და 18 წლის ფეხბურთელის გადატვირთვას არ აპირებს, რათა ის ტურნირის გადამწყვეტი ფაზისთვის შეინახოს, ამიტომ კაბო-ვერდესთან მატჩს იამალი, სავარაუდოდ, სკამიდან დაიწყებს.

სკანდალური ტრანსფერი მუნდიალის პარალელურად: კუკურელია რეალში?

ნაკრებში ტრავმების გარდა კიდევ ერთი დიდი განხილვის თემა მარკ კუკურელიას გარშემო ატეხილი სატრანსფერო ხმებია. გავრცელებული ინფორმაციით, მადრიდის რეალი ჩელსისთან 60-მილიონიან გარიგებაზე უკვე შეთანხმდა, რათა მარცხენა მცველი ბერნაბეუზე გადაიყვანოს. დე ლა ფუენტეს თქმით, ეს ხმები ფეხბურთელს ყურადღებას არ უფანტავს.

ესპანეთის ნაკრები, რომელიც ტურნირის ერთ-ერთ მთავარ ფავორიტად ითვლება, ჯგუფურ ეტაპზე კაბო-ვერდეს შემდეგ საუდის არაბეთსა და ურუგვაის დაუპირისპირდება.