სერია ა-ს მესამე ტურში ფროზინონემ ვენეციის წინააღმდეგ დრამატულ ბრძოლაში იმარჯვა (3:2), სადაც გამარჯვების გოლი 83-ე წუთზე გიორგი კვერნაძემ გაიტანა.
ეს ქართველი თავდამსხმელისთვის იტალიის უმაღლეს დივიზიონში სადებიუტო გოლი იყო.
იტალიური გამოცემა Tuttomercatoweb ვრცელ სტატიაში ქართველი ფეხბურთელის წარმატებულ სტარტს ეხმაურება და იმ გზას აანალიზებს, რომელიც მან სამი წლის განმავლობაში გაიარა.
გამოცემა წერს, რომ კვერნაძე სერია ა-ში ხვიჩა კვარაცხელიას შემდეგ გამოჩნდა. ისინი აღნიშავენ, რომ მათი ისტორიები განსხვავებულია, რადგან კვარა უკვე ოქროს ბურთისთვის იბრძვის, ხოლო კვერნაძისთვის გზა უფრო გრძელი აღმოჩნდა, თუმცა მაინც შეიძლება მსგავსებების დანახვა.
Tuttomercatoweb აღნიშნავს:
თუ საჭირო უნარები გაქვს და ეს კვერნაძის შემთხვევაში სწორედ ასეა, გრძელვადიან პერსპექტივაში აუცილებლად გამარჯვებული იქნები.
კვერნაძე 2023 წლის ზაფხულში ფროზინონეს მაშინდელმა სპორტულმა დირექტორმა, გუიდო ანჯელოტიმ, ხვიჩას გარემოცვის რჩევით დაიმატა. ის საქართველოში ჩაფრინდა ფეხბურთელის სანახავად და საბოლოოდ ტრანსფერი დაახლოებით ნახევარი მილიონი ევროს სანაცვლოდ შედგა.
პირველ სეზონში სათამაშო დრო მცირე ჰქონდა, თუმცა როდესაც ფროზინონე სერია ბ-ში დაქვეითდა, ქართველმა მარცხენა ფლანგზე ბრწყინვალება დაიწყო (33 მატჩი, 3 გოლი, 5 ასისტი). ამას მომდევნო სეზონში 36 შეხვედრაში 5 გოლი და 5 საგოლე პასი მოჰყვა, რითაც გუნდს სერია A-ში დაბრუნებაში დაეხმარა.
გამოცემა წერს:
კვარა ხელშეუხებელია და ყველა ქართველი ფეხბურთელის ჰორიზონტს წარმოადგენს. თუმცა, ამასობაში კვერნძე ამტკიცებს, რომ ფროზინონე სამი წლის წინ არ ცდებოდა. პირიქით, უბრალოდ დრო იყო საჭირო.
