ფეხბურთის კვლევითმა ცენტრმა (CIES Football Observatory) მსოფლიოს ყველაზე ძვირად ღირებული მეკარეების განახლებული სია გამოაქვეყნა, სადაც გიორგი მამარდაშვილი 33-ე პოზიციას იკავებს.
2024 წელს ქართველი კიპერი საუკეთესო ხუთეულში შედიოდა, თუმცა ლივერპულში გადასვლის შემდეგ, მცირე სათამაშო დროის გამო, მისმა სატრანსფერო ღირებულებამ იკლო და ამჟამად 28.1 მილიონ ევროს შეადგენს.
მიუხედავად პოზიციების დაკარგვისა, მამარდაშვილი რეიტინგში მაინც უსწრებს ისეთ ცნობილ მეკარეებს, როგორებიც მსოფლიოს ჩემპიონი ემილიანო მარტინესი (27 მლნ), ვანია მილინკოვიჩ-სავიჩი (26.9 მლნ) და ინგლისის ნაკრების კარის დარაჯი ჯორდან პიკფორდი (25.2 მლნ) არიან.
რაც შეეხება რეიტინგის ლიდერებს, სიის სათავეში ბარსელონას ესპანელი კიპერი, ჟოან გარსია იმყოფება, რომლის ღირებულებაც 80.6 მილიონი ევროა. მეორე და მესამე ადგილებს კი ჯანლუიჯი დონარუმა (მანჩესტერ სიტი, 79.9 მლნ) და სენე ლამენსი (მანჩესტერ იუნაიტედი, 64.2 მლნ) ინაწილებენ.