რონალდუს კიდევ ერთი წაგებული ფინალი და კონტრასტი მესისთან

კრიშტიანუ რონალდუს მორიგმა მარცხმა ალ ნასრის შემადგენლობაში, პორტუგალიელი ვარსკვლავის საუდის არაბულ კარიერასა და ლიონელ მესისთან მის მარადიულ შედარებაზე დისკუსია ხელახლა გაააქტიურა.

16 მაისს, ალ ნასრი აზიის ჩემპიონთა ლიგის (AFC Champions League 2) ფინალში იაპონურ გამბა ოსაკასთან 0:1 დამარცხდა, რაც რონალდუსთვის უმძიმესი დარტყმა აღმოჩნდა.

Sports Illustrated-ის მონაცემებით, მას შემდეგ, რაც რონალდუ 2023 წლის იანვარში საუდის არაბეთში გადავიდა, მან გუნდთან ერთად 14 სხვადასხვა ტურნირში მიიღო მონაწილეობა და ჯერჯერობით ვერცერთი ოფიციალური ტიტულის მოგება ვერ შეძლო. ეს ფაქტი განსაკუთრებულ ფრუსტრაციას იწვევს მებრძოლი ხასიათის მქონე ფეხბურთელში, რომლის მთელი კარიერაც გადამწყვეტ მომენტებსა და თასების მოგებაზე იყო აგებული.

ეს წარუმატებელი სერია კიდევ უფრო თვალსაჩინოს ხდის კონტრასტს ლიონელ მესისთან. არგენტინელმა ინტერ მაიამიში გადასვლისთანავე შეძლო გუნდური ჯილდოების მოპოვება, მათ შორის 2023 წლის Leagues Cup-ი და 2024 წლის Supporters’ Shield-ი, მაშინ როცა კრიშტიანუ კვლავ პირველი ოფიციალური ტიტულის მოლოდინშია.

კარიერის განმავლობაში რონალდუმ საკლუბო და სანაკრებო დონეზე 42 ფინალი ითამაშა, საიდანაც 27 მოიგო და 15 წააგო. თუმცა, აღსანიშნავია, რომ ალ ნასრში მან უკვე მე-4 ფინალი დათმო, ზუსტად იმდენივე, რამდენიც მადრიდის რეალში გატარებული მრავალწლიანი და ოქროს ეპოქის დროს. სხვაობა ისაა, რომ ევროპაში ფინალების წაგებას უმსხვილესი ტიტულები აბალანსებდა, საუდის არაბეთში კი გულშემატკივარი სულ უფრო ხშირად ხედავს რონალდუს იმედგაცრუებულ სახეს.

პორტუგალიელს რეაბილიტაციის შანსი სეზონის ბოლომდე კიდევ აქვს, ალ ნასრი ჩემპიონატის დასრულებამდე ერთი ტურით ადრე სატურნირო ცხრილის სათავეშია. თუმცა, სანამ ის პირველ ოფიციალურ თასს არ ასწევს, საფეხბურთო სამყაროში მთავარი კითხვა კვლავ აქტუალური იქნება: საბოლოოდ გაქრა თუ არა კრიშტიანუს გამარჯვებულის აურა?