როსენიორი: "რობ სანჩესის შეცდომა? ეს ჩემი ბრალია"

ჩელსის მთავარმა მწვრთნელმა, ლიამ როსენიორმა, არსენალთან ინგლისის ლიგის თასის ნახევარფინალის პირველ მატჩში განცდილი მარცხის (2:3) შემდეგ, გუნდის გაშვებულ გოლებზე და მეკარე რობერტ სანჩესის თამაშზე ისაუბრა.

შეხვედრის პირველ ტაიმში ანგარიში მე-7 წუთზე ბენ უაიტმა გახსნა მას შემდეგ, რაც სანჩესმა კუთხურიდან ჩაწოდებულ ბურთზე გამოსვლა ვერ მოასწრო.

„პირველი გაშვებული გოლი ნამდვილად გულდასაწყვეტი იყო. თუმცა ეს გუნდური გოლია. ეს მხოლოდ რობ სანჩესის ბრალი არ არის. მე რობს ვთხოვ იმ რაღაცების კეთებას, რასაც ის ადრე არ აკეთებდა. მატჩის წინ ვუთხარი კიდეც, რომ როდესაც ჩემი ფეხბურთელები შეცდომებს უშვებენ — პასუხისმგებლობა ჩემზე მოდის. ეს ჩემი ბრალია.

მეორე ტაიმში მან მსოფლიო დონის სეივი შეასრულა. იმ გოლს შეიძლებოდა მთელი დაპირისპირების ფარგლებში გამარჯვების შანსი წაერთვა ჩვენთვის. მისი თამაშის წაკითხვის უნარი კიდევ უფრო გაუმჯობესდება.

მას ძალიან კარგი სეზონი აქვს. ბევრი ძალიან, ძალიან კარგი მომენტი ჰქონდა.

მის მიმართ პოზიტიურ დამოკიდებულებას შევინარჩუნებ, ისევე, როგორც მთლიანად გუნდის მიმართ. ჩემი ამოცანა მათი დახმარებაა და არა დადანაშაულება“, — განაცხადა ლიამ როსენიორმა.