სად სურს კონტეს ნაპოლიდან წასვლა?

ანტონიო კონტე იტალიის ეროვნული ნაკრების მწვრთნელის პოსტზე დაბრუნების იდეით არის მოხიბლული, ნაპოლი კი მის ზაფხულში წასვლას წინააღმდეგობას არ გაუწევს.

კონტე ჯენარო გატუზოს შემცვლელის მთავარ კანდიდატად განიხილება. იტალიელი სპეციალისტის კონტრაქტი 2027 წლის ივნისამდეა ძალაში, თუმცა კონტე ძალიან არის დაინტერესებული ნაკრებში მეორედ დაბრუნებით.

კონტე იტალიას 2014-დან 2016 წლამდე წვრთნიდა. მაშინ გუნდმა ევროპის ჩემპიონატის მეოთხედფინალს მიაღწია, სადაც გერმანიასთან პენალტების სერიაში დამარცხდა.

კონტეს ნაკრებში მუშაობის პერიოდთან საუკეთესო მოგონებები აკავშირებს და იტალიის ფეხბურთის ფედერაციაშიც (FIGC) ყველა მიიჩნევს, რომ 56 წლის სპეციალისტი სწორი არჩევანია იტალიის აღსაღორძინებლად.

როგორც ცნობილია, ნაპოლის პრეზიდენტი აურელიო დე ლაურენტისი კონტეს ნაკრებში გაშვებაზე თანხმობას მისცემს, მიუხედავად იმისა, რომ კონტრაქტის ამოწურვამდე კიდევ ერთი წელია დარჩენილი.

ივნისის ამხანაგური მატჩებისთვის დროებითი მწვრთნელი, სავარაუდოდ სილვიო ბალდინი დაინიშნება, ხოლო ნაკრების ახალ მუდმივ თავკაცს ივნისის ბოლოს ან ივლისის დასაწყისში შეარჩევენ, რადგან ფედერაციის პრეზიდენტის არჩევნები 22 ივნისამდე არ იგეგმება.

იტალიის ნაკრებს ასევე უკავშირებდნენ მასიმილიანო ალეგრისა და რობერტო მანჩინის, თუმცა მილანის მწვრთნელმა განაცხადა, რომ სან სიროზე ბედნიერია. რაც შეეხება მანჩინის, მასთან დაკავშირებით ეჭვებს მისი 2023 წელს წასვლა იწვევს, როდესაც მან მოულოდნელად დატოვა პოსტი და რამდენიმე კვირაში საუდის არაბეთის ნაკრები ჩაიბარა.