საერთაშორისო ოლიმპიურმა კომიტეტმა რუსეთს დისკვალიფიკაცია გაუუქმა

საერთაშორისო ოლიმპიური კომიტეტის (IOC) აღმასრულებელმა საბჭომ (EB) რუსეთის ოლიმპიური კომიტეტის (ROC) დისკვალიფიკაცია დროებით გააუქმა, რომელიც 2023 წლის 12 ოქტომბრიდან მოქმედებდა.

,,გადაწყვეტილება IOC-ის იურიდიულ საკითხთა კომისიის მიერ ჩატარებული საფუძვლიანი ანალიზის შემდეგ იქნა მიღებული. გათვალისწინებული იქნა ის გარემოება, რომ რუსეთის ოლიმპიური კომიტეტის წევრებს შორის აღარ არიან რეგიონული სპორტული ორგანიზაციები იმ ტერიტორიებიდან, რომლებიც უკრაინის ეროვნული ოლიმპიური კომიტეტის (NOC) იურისდიქციაში შედის.

გარდა ამისა, რუსეთის ოლიმპიურმა კომიტეტმა დაადასტურა, რომ აღნიშნულ ტერიტორიებზე არ ახორციელებს და არც მომავალში განახორციელებს რაიმე სახის საქმიანობას.

IOC-ის აღმასრულებელი საბჭო გააგრძელებს რუსეთის ოლიმპიური კომიტეტის მიერ აღნიშნულ ტერიტორიებზე შესაძლო საქმიანობის შესახებ ვითარების ყურადღებით მონიტორინგს და იტოვებს უფლებას, საჭიროების შემთხვევაში, დამატებითი ზომები მიიღოს.

საერთაშორისო შეჯიბრებებზე დაბრუნებულმა ყველა რუსმა სპორტსმენმა უნდა დააკმაყოფილოს შესაბამისი ანტიდოპინგური მოთხოვნები.

IOC რუსეთში თავის ღონისძიებებს არ ჩაატარებს და რუსეთის მთავრობის ან სახელმწიფო თანამდებობის პირებს საკუთარ ღონისძიებებზე არ მიიწვევს.

ოლიმპიურ თამაშებზე რუსეთის დროშის, ჰიმნის, ფერების ან ნებისმიერი სხვა საიდენტიფიკაციო სიმბოლოს გამოყენებასთან დაკავშირებით IOC გადაწყვეტილებას შესაბამის დროს მიიღებს.

IOC კვლავ სოლიდარობას უცხადებს უკრაინის ოლიმპიურ საზოგადოებას." - წერია ოლიმპიური კომიტეტის განცხადებაში.