ვესტ ჰემ იუნაიტედის თანამფლობელსა და ყოფილ თანათავმჯდომარეს, დევიდ სალივანს, უკვე სამი წელია, კლუბის ქალთა და ახალგაზრდულ გუნდებთან კონტაქტი აკრძალული აქვს.
შეზღუდვა 2023 წელს, მას შემდეგ დაწესდა, რაც ინგლისის ფეხბურთის ასოციაციამ სალივანის ქცევასთან დაკავშირებით გამოძიება დაიწყო.
ბრიტანული მედიის (BBC და The Times) მასშტაბური გამოძიების შედეგად ცნობილი გახდა, რომ მრავალმა ქალმა 77 წლის მილიარდერი ძალაუფლების ბოროტად გამოყენებასა და სექსუალური ხასიათის დანაშაულებში დაადანაშაულა. სალივანი, რომელმაც ქონება პორნოინდუსტრიითა და გაზეთების ბიზნესით დააგროვა, ბრალდებებს კატეგორიულად უარყოფს და მათ „ფაქტობრივად არასწორს“ და „უსამართლოს“ უწოდებს. თუმცა, გამოძიების ფონზე, მან შაბათს კლუბის თანათავმჯდომარის პოსტი დატოვა.
ბრალდებები და სასამართლო დავა BBC-სთან - რატომ დატოვა სალივანმა ვესტ ჰემი
უსაფრთხოების ჯგუფმა, FA-სა და ადგილობრივი ხელისუფლების მონაწილეობით, სალივანს საკუთარი კლუბის ქალთა და ახალგაზრდულ გუნდებთან წვდომა და მატჩებზე დასწრება აუკრძალა. ბრალდებები ეხება სალივანის საქმიანობას პორნოგრაფიისა და მედიის სფეროში, სადაც ის ახალგაზრდა მოდელებს დასაქმების სანაცვლოდ ავიწროებდა.
გამოძიების ფარგლებში 8 ქალმა პოლიციას მიმართა, თუმცა ამ ეტაპზე საქმეებზე ბრალი არავისთვის წაყენებულა.
დიდი ბრიტანეთის კულტურის მინისტრმა ლიზა ნენდიმ ფაქტებს „შოკისმომგვრელი“ უწოდა და FA-სგან მომხდარის სასწრაფო ახსნა-განმარტება მოითხოვა.
მიუხედავად იმისა, რომ სალივანი კლუბის ყველაზე მსხვილი აქციონერი რჩება, სკანდალი ინგლისური ფეხბურთის მმართველ ორგანოებს საზოგადოების მხრიდან სერიოზული კრიტიკის ქვეშ აყენებს - კითხვები ჩნდება იმასთან დაკავშირებით, თუ რატომ არ გაასაჯაროეს დაწესებული შეზღუდვები და რატომ გაგრძელდა სალივანის კლუბში ყოფნა ასეთი სერიოზული გამოძიების მიუხედავად.
