საქართველოში დაბრუნდა - ყენია ლოკომოტივის ასაკობრივ გუნდს გაწვრთნის

ლევან ყენია სამწვრთნელო საქმიანობას საქართველოში, კონკრეტულად კი ყოფილ კლუბ თბილისის ლოკომოტივში გააგრძელებს.

Adjarabet Arena-ს ინფორმაციით, 35 წლის სპეციალისტი სათავეში ჩაუდგა ლოკომოტივის 19-წლამდე გუნდს, რომელიც ოქროს ლიგაში ასპარეზობს. ახალგაზრდა მწვრთნელი უკვე საქმეშია და ფეხბურთელები რამდენიმე დღეა მისი ხელმძღვანელობით ვარჯიშობენ.

მთავარი გუნდის მე-3 ლიგაში გავარდნის შემდეგ, ლოკომოტივის ხელმძღვანელობისთვის 19-წლამდე გუნდი კიდევ უფრო პრიორიტეტულად იქცა და აქცენტის გაკეთებას მნიშვნელოვნად მასზე გეგმავენ. 19-წლამდე ოქროს ლიგის ჩემპიონი UEFA Youth League-ის საკვალიფიკაციო ეტაპზე გადის.

ლევან ყენიამ სამწვრთნელო კარიერა 2021 წლის ზაფხულში, გერმანულ უერდინგენში დაიწყო, როცა მთავარი მწვრთნელის ასისტენტი იყო, 2024 წელს კი რამდენიმე თვით მოთამაშე-მწვრთნელის ფუნქციებს ითავსებდა.