სების ინტერვიუ - მაქსის უნარები, რჩევა ლუისს და ლანდოს ადამიანობა

ფორმულა 1-ის ოთხგზის ჩემპიონმა, სებასტიან ფეტელმა F1's Beyond The Grid Podcast-ში მაქს ვერსტაპენზე, ლუის ჰამილტონსა და ლანდო ნორისზე ისაუბრა.

რედ ბულის ყოფილმა ჩემპიონმა ასევე ოთხგზის ჩემპიონ მაქსის შესაძლებლობებზე შემდეგი რამ თქვა:

„ვფიქრობ, აღმაფრთოვანებელი ის არის, რომ მაქსი კიდევ უკეთესი ხდება.

ვიცით, რომ ის კარგია, მაგრამ ის კვლავ უმჯობესდება. ისევ მშიერია და ისევ სურს სწავლა. ვფიქრობ, კულისებში ძალიან ბევრს მუშაობს და ეს არის ის, რაც მას ასე ძლიერს ხდის.

და რა თქმა უნდა, მას დამატებით დიდი ნიჭიც აქვს. მაგრამ მიუხედავად იმისა, რომ ის დღეს ერთ-ერთი ყველაზე ნიჭიერი პილოტია, საბოლოოდ ის, რაც მას ასე ძლიერს ხდის ამ ყველაფრის კომბინაციაა, თუმცა მთავარი ინგრედიენტი მაინც მის თავშია.

ვფიქრობ, გადამწყვეტ სიტუაციებში ის სიმშვიდეს ინარჩუნებს, თითქმის არასოდეს უშვებს შეცდომას, აკეთებს იმას, რაც საჭიროა და როცა საჭიროა; ის ზეწოლას გრძნობს, ჩვენ ყველანი ვგრძნობთ, მაგრამ მას შეუძლია იპოვოს სივრცე თავის თავში, სადაც შეუძლია ეს გვერდზე გადადოს და მთავარზე კონცენტრირდეს."

ფეტელი ასევე ჰყვება იმ ერთადერთ რჩევაზე, რაც ლუის ჰამილტონს ფერარიში გადასვლისას მისცა.

„მას მერსედესში ძალიან, ძალიან დიდი დრო აქვს გატარებული და ამის შემდეგ ფერარიში გადასვლა ნამდვილად უზარმაზარი განსხვავება იქნებოდა, რადგან გუნდის გული და კულტურა იტალიურია. ენა კი ინგლისურია.

ის გუნდის ყველა წევრს ესმის, მაგრამ ასევე არიან თანამშრომლები, რომლებიც ინგლისურად საერთოდ არ ლაპარაკობენ, ან კარგად არ ლაპარაკობენ და თუ ენას კარგად ვერ ფლობ, თითქოს ყველაფერი ისე არ მიდის. საკითხავია, მართლა უგებ ხალხს და კულტურას? ვფიქრობ, ეს იყო კრიტიკული შეცდომა, რომელიც მე დავუშვი.

უკან რომ ვიხედები, ვისწავლე იტალიური, დავდიოდი გაკვეთილებზე და რაღაც დონეზე ვიგებდი ყველაფერს, მესმოდა, მაგრამ სრულყოფილი არ ვიყავი. უნდა მეცადა, რომ იტალიური ბევრად უკეთესად მესწავლა, იქნებ მეტი დროც უნდა გამეტარებინა იტალიაში, რათა ნამდვილად უკეთ გამეგო კულტურა, რადგან კულტურა ხალხიცაა.

ლუისს ეს წინასწარ ვუთხარი, როცა გადასვლა გადაწყვიტა: ერთადერთი რჩევა, რაც შემიძლია მოგცე, არის ის, რომ ისწავლო ენა ძალიან, ძალიან კარგად.“

სებასტიანმა ლანდო ნორისის შესახებაც ისაუბრა:

„ზოგადად მისით ძალიან აღფრთოვანებული ვარ. ერთია მისი მრბოლელობა, მაგრამ კიდევ უფრო მეტად მისი ადამიანობა, როგორი მამაცი არის, როცა იხსნება და საუბრობს იმაზე, თუ როგორ გრძნობს თავს.

ეს კარგად ერწყმის იმას, რასაც ადრე ვცდილობდი ამეხსნა, როცა ეს უბრალოდ ტაბუდადებული თემა იყო. თითქოს ასე იყო: ამაზე არ ლაპარაკობდი და არც არავინ ლაპარაკობდა და შემდეგ იქმნებოდა მრბოლელების იმიჯი, რომ ჩვენ მანქანები ვართ, ძალიან ზუსტები, შეცდომებს არ ვუშვებთ, ყველაფერი რბოლაა და სისუსტეებს არ აჩვენებ.

ვფიქრობ, ეს ყველაფერი სისულელეა. ყველანი ადამიანები ვართ. ყველას გვაქვს პრობლემები, რომლის წინაშეც ვდგავართ.

ძალიან კარგია იმის ნახვა, რომ ლანდო ასეთი მისაბაძია ფორმულა 1-ის შიგნით, მაგრამ განსაკუთრებით მის გარეთ. ვფიქრობ, სწორედ ამიტომ არის ის ასეთი პოპულარული, რადგან ის ხალხს რაღაც სხვას აძლევს.

არა მხოლოდ იმას, რომ კარგი მრბოლელია და პოპულარულია იმიტომ, რომ იგებს ან იმიტომ, რომ შედეგები აქვს. არა - ის ხალხს სხვა რამეს აძლევს და სწორედ ამას აფასებენ.

ვფიქრობ, სწორედ ამიტომ არის ის ერთ-ერთი ყველაზე პოპულარული პილოტი დღეს და ეს მართლაც შესანიშნავი რამ არის. რა თქმა უნდა, ვხედავ სხვების კომენტარებსაც, რომლებიც მას აკრიტიკებენ -  ‘ეს მას მოწყვლადს ხდის, ეს კარგი არ არის.’ მაგრამ მე კატეგორიულად არ ვეთანხმები.“ - განაცხადა გერმანელმა ჩემპიონმა.