სერენა უილიამსი კორტზე დასაბრუნებლად ემზადება

ჩოგბურთის ლეგენდა სერენა უილიამსი მომავალ კვირას HSBC Championships-ის წყვილთა ტურნირზე კორტზე დაბრუნდება, რაც Queen’s Club-მა ოფიციალურად დაადასტურა.

44 წლის უილიამსს კარიერის დასრულება ოფიციალურად არასოდეს გამოუცხადებია, თუმცა მისი ბოლო მატჩიდან თითქმის 4 წელი გავიდა.

მიუხედავად ამისა, გასული წლის ბოლოს გრანდ სლემის 23-გზის ჩემპიონმა შესაძლო დაბრუნებისთვის მზადების ნაბიჯების გადადგმა დაიწყო.

Queen’s Club იდეალური ადგილია ჩემი კარიერის ამ ახალი ეტაპის დასაწყებად.

„ბალახის საფარზე ჩემი კარიერის ყველაზე მნიშვნელოვანი მომენტები მქონდა და მოხარული ვარ, რომ კვლავ ვიბრძოლებ სპორტის ერთ-ერთ ყველაზე გამორჩეულ არენაზე.“ - განაცხადა უილიამსმა Lawn Tennis Association-ის ვებგვერდზე გამოქვეყნებულ განცხადებაში.

უილიამსმა ბოლოს 2022 წელს ითამაშა, როდესაც აშშ-ის ღია პირველობაზე ავსტრალიელ აილა ტომლიანოვიჩთან დამარცხდა. მაშინ მას თავის სიტყვაში ,,კარიერის დასრულება“ არ გამოუყენებია და განაცხადა, რომ „ჩოგბურთისგან სხვა მიმართულებით ვითარდებოდა“.

HSBC Championships ლონდონში 6 ივნისს ქალთა საკვალიფიკაციო ეტაპით დაიწყება. ქალთა ძირითადი ბადე კი 8 ივნისს აიღებს სტარტს.

უილიამსი წყვილთა ტურნირში მონაწილეობას მიიღებს, თუმცა ჯერჯერობით უცნობია, ვინ იქნება მისი პარტნიორი.