შერმადინის ბოლო მატჩი ნაკრებში - ჩვენი გუნდი დღეს ესპანეთს ხვდება

საქართველოს ნაკრები 2027 წლის მსოფლიო ჩემპიონატის შესარჩევი ეტაპის მე-2 ტურის შეხვედრას ტენერიფეში, ესპანეთის ნაკრების წინააღმდეგ დღეს გამართავს.

კალათბურთის ფედერაციის პრესსამსახურის ინფორმაციით, მატჩის წინა დღის სავარჯიშო სესიაზე, მთავარმა მწვრთნელმა ჯიკიჩმა გიორგი შერმადინს, თორნიკე შენგელიას, დუდა სანაძესა და ბექა ბურჯანაძეს დასვენების საშუალება მისცა.

ალექსანდრ ჯიკიჩმა დაასახელა ის 12-კაციანი განაცხადი, რომლითაც ჩვენი გუნდი შეხვედრაში იქნება წარმოდგენილი:

გიორგი შერმადინი, თორნიკე შენგელია, დუდა სანაძე, ბექა ბურჯანაძე, გიორგი კორსანტია, მათე ხატიაშვილი, თად მაკფადენი, კახა ჯინჭარაძე, რატი ანდრონიკაშვილი, ალექსანდრე ფევაძე, გიორგი ტურძილაძე და სანდრო სანაძე.

გუნდთან ერთად არიან გიორგი კობახიძე და ლუკა მაზიაშვილი, თუმცა ჯიკიჩმა ისინი სამატჩო განაცხადს მიღმა დატოვა.

ნაკრებში ბოლო მატჩს ატარებს 36 წლის გიორგი შერმადინი, რომელიც 19-წლიან სანაკრებო კარიერას ასრულებს. ჩვენს ეროვნულ გუნდში 2006 წლის 3 სექტემბრიდან თამაშობს. სიმბოლურია, რომ შერმო ბოლო სანაკრებო შეხვედრას ატარებს იმ არენაზე, რომელზეც მისი კლუბი ტენერიფე თამაშობს - ქართველი ტენერიფეში 2019 წლიდან გამოდის და ამჟამად გუნდის კაპიტანია.

შეგახსენებთ, საქართველოს ნაკრებმა შესარჩევის 1-ელი ტურის მატჩი შინ უკრაინასთან წააგო, ესპანელებმა კი სტუმრად დანია 10-ქულიანი სხვაობით დაამარცხეს.

ესპანეთისა და საქართველოს ეროვნულ გუნდთა შეხვედრა თბილისის დროით 22:45 საათიდან დაიწყება. პირდაპირ რეპორტაჟს საქართველოს პირველ არხზე ვიხილავთ.