შერმადინის ბოლო სანაკრებო მატჩი თბილისში - საქართველომ მსოფლიოს შესარჩევი მარცხით დაიწყო

საქართველოს საკალათბურთო ნაკრებმა 2027 წლის მსოფლიო ჩემპიონატის შესარჩევი ეტაპი უკრაინასთან საშინაო მარცხით დაიწყო - 79:92.

პირველი ნახევარი ჩვენი გუნდის უპირატესობით წარიმართა და 48:43 დასრულდა, მესამე მეოთხედიდან კი უკრაინელებმა თამაშში გარდატეხა შეიტანეს და დასკვნითი ორივე მეოთხედი ჯამში 18-ქულიანი სხვაობით მოიგეს.

მატჩის საუკეთესო მოთამაშე მეტოქის გამთამაშებელი ოლეკსანდრ კოვლიარი (31 ქულა, 6 მოხსნა, 6 ასისტი გახლდათ, ორმაგი დუბლი შეასრულა ვიაჩესლავ ბობროვმა - 11 ქულა, 15 მოხსნა, 3 ასისტი.

რაც შეეხება საქართველოს, დუდა სანაძემ 22 ქულა და 5 მოხსნა მიითვალა, თედ მაკფადენმა - 17 ქულა, 2 მოხსნა და 1 ასისტი, ხოლო თორნიკე შენგელიამ - 17 ქულა, 6 მოხსნა და 4 ასისტი.

ბოლო საშინაო სანაკრებო მატჩი ჩაატარა გიორგი შერმადინმა, რომელმაც სიმბოლურია, რომ თამაშის პირველი ქულები აიღო და ჩვენები 2:0 დააწინაურა - ჯამში 7 ქულა, 6 მოხსნა და 3 ასისტი ჩაიწერა აქტივში. 

მთელი შეხვედრის განმავლობაში სათამაშო მოედნის გარშემო აჭარაბეთის კამპანია ანათებდა წარწერით: "მადლობა, შერმადინი".

შერმოს დებიუტი ნაკრებში 2006 წლის 3 სექტემბერს შედგა. იგი ერთადერთი ქართველია, რომელსაც დამოუკიდებლობის შემდეგ საქართველოს ნაკრების მიერ ნათამაშებ 7-ვე დიდ ტურნირზე აქვს მონაწილეობა მიღებული - 6 ევრობასკეტი და 1 მსოფლიო ჩემპიონატი.

ლეგენდარული კალათბურთელი 19-წლიან სანაკრებო კარიერას დაასრულებს იმ ქალაქში, რომლის კლუბშიც 6 წელია თამაშობს - ტენერიფეში ესპანეთის ნაკრები 30 ნოემბერს გვიმასპინძლებს.

მსოფლიო ჩემპიონატის შესარჩევი ეტაპის პირველი რაუნდის 4-გუნდიანი ჯგუფიდან შემდეგ რაუნდში 3 საუკეთესო ნაკრები გადადის.