სიახლე ასტონ მარტინში - გუნდს ედრიენ ნიუი უხელმძღვანელებს

ფორმულა 1-ში ასტონ მარტინის გუნდმა 2026 წლის სეზონის წინ სტრუქტურაში ცვლილებები გამოაცხადა.

ენდი ქოუელი და ედრიენ ნიუი შეთანხმდნენ, რომ თავიანთ პასუხისმგებლობებს გაიყოფენ, რათა კონცენტრირება ინდივიდუალურ ძლიერ მხარეებზე შეძლონ, რაც ორგანიზაციულ ეფექტიანობას უზრუნველყოფს.

ენდი ქოუელი სტრატეგიული დირექტორის თანამდებობას დაიკავებს, სადაც თავის უნიკალურ გამოცდილებას გუნდს, Honda-ს, Aramco-სა და Valvoline-ს შორის ტექნიკური პარტნიორობის ოპტიმიზაციისთვის გამოიყენებს.

ედრიენ ნიუი კი 2026 წლიდან გუნდის ხელმძღვანელის (Team Principal) როლს გადაიბარებს და ტექნიკურ გუნდს, მათ შორის ბოლიდის ტრასაზე ოპერაციებს უხელმძღვანელებს.

ნიუიმ ასტონ მარტინში მუშაობა მიმდინარე წლის 1 მარტს, მას შემდეგ დაიწყო, რაც თითქმის ორი ათწლეული რედ ბულში გაატარა. ასტონ მარტინის აღმასრულებელმა ხელმძღვანელმა, ლოურენს სტროლმა გუნდს სიახლის შესახებ დღეს ამცნო.

ასტონ მარტინის გუნდის ხელმძღვანელის პოზიციას კრისტიან ჰორნერსაც უკავშირებდნენ, რომელიც ნიუის მსგავსად რედ ბულიდან ცოტა ხნის წინ წამოვიდა, თუმცა საბოლოოდ ასტონ მარტინის სადავეები დიზაინის გურუს ჩააბარეს.

შეგახსენებთ, რომ ასტონ მარტინის მრბოლელები ლენს სტროლი და ფორმულა 1-ის ორგზის ჩემპიონი, ლეგენდარული ფერნანდო ალონსო არიან.