ალექსანდერ ისაკმა შესაძლოა ითამაშოს ინგლისის ასოციაციის თასის მეოთხედფინალში მანჩესტერ სიტის წინააღმდეგ. მან გუნდურ ვარჯიშში მონაწილეობა ოპერაციის ჩატარებიდან 101 დღის შემდეგ პირველად მიიღო.
ისაკს 20 დეკემბრიდან, მას შემდეგ რაც ფეხი მოიტეხა და კოჭის ოპერაცია დასჭირდა არ უთამაშია. 26 წლის შვედმა თავდამსხმელმა, რომელმაც წითლების მაისურით 16 მატჩში 3 გოლის გატანა მოასწრო ტოტენჰემთან მიღებულ ტრავმამდე, სრულფასოვანი ვარჯიში ხუთშაბათს განაახლა.
მთავარმა მწვრთნელმა, არნე სლოტმა განაცხადა, რომ ისაკის თამაში მხოლოდ რამდენიმე წუთით იგეგმება. მის გადაწყვეტილებას ართულებს ის ფაქტი, რომ შაბათს ეტიჰადზე გასამართ შეხვედრაში შესაძლოა გამარჯვებულის გამოსავლენად დამატებითი დრო გახდეს საჭირო.
სლოტმა განაცხადა:
რთული სიტუაციაა, რადგან ეს არ არის ჩვეულებრივი თამაში. შესაძლოა რამდენიმე წუთი ითამაშოს, მაგრამ მოდით დაველოდოთ, ვნახოთ როგორ იქნება დღეს და თავად რას იტყვის საკუთარ შეგრძნებებზე. ნათელია, რომ 100 დღეში ჩატარებული ორი ვარჯიშის შემდეგ, მისი სასტარტო შემადგენლობაში დაყენება აზრს მოკლებულია.
თუ მას ახლა შევადარებ მის ტრავმამდელ მდგომარეობას, ვხედავ მოთამაშეს, რომელიც გაცილებით ძლიერია და ფიზიკურად ბევრად უკეთეს ფორმაშია. მგონი ბევრჯერ მითქვამს, რომ მომავალ სეზონში, როცა ის სრულფასოვან წინასასეზონო მომზადებას გაივლის, მისგან უფრო მეტს უნდა ველოდოთ.
