ლივერპულის გვერდმა იბრაჰიმა კონატეს მიმართ რასისტული შეურაცხყოფის შესახებ ოფიციალური განცხადება გაავრცელა.
„ლივერპული შოკირებულია და აღშფოთებულია იმ საზიზღარი და ამაზრზენი რასისტული შეურაცხყოფით, რომელიც იბრაჰიმა კონატეს სოციალურ მედიაში მიემართა.
ასეთი ქცევა სრულიად მიუღებელია. ის არის დეჰუმანიზებელი, მშიშარა და სიძულვილზე დაფუძნებული. რასიზმს არ აქვს ადგილი ფეხბურთში, არ აქვს ადგილი საზოგადოებაში და საერთოდ არსად, არც ონლაინ, არც რეალურ ცხოვრებაში.
ჩვენი მოთამაშეები არ არიან სამიზნეები. ისინი ადამიანები არიან.
შეურაცხყოფა, რომელიც კვლავაც მიემართება მოთამაშეებს, ხშირად ანონიმური ანგარიშების მიღმა დამალული პირებისგან, ლაქაა როგორც თამაშისთვის, ისე იმ პლატფორმებისთვის, რომლებიც ამას არსებობის საშუალებას აძლევს.
ფეხბურთის მთელმა სამყარომ ერთად უნდა თქვას, მკაფიოდ და ყოველგვარი კომპრომისის გარეშე, რომ ეს არ იქნება მოთმენილი. მხოლოდ დაგმობის სიტყვები საკმარისი არ არის.
სოციალური მედიის კომპანიებმა უნდა აიღონ პასუხისმგებლობა და იმოქმედონ ახლა. ამ პლატფორმებს აქვთ ძალა, ტექნოლოგია და რესურსები, რათა თავიდან აიცილონ ასეთი შეურაცხყოფა, თუმცა ძალიან ხშირად ამას ვერ ახერხებენ.
რასისტული სიძულვილის უკონტროლოდ გავრცელების დაშვება არჩევანია და ეს არჩევანი კვლავაც აზიანებს მოთამაშეებს, მათ ოჯახებსა და საზოგადოებებს მთელ საფეხბურთო სამყაროში.
ჩვენ გავაგრძელებთ იბრაჰიმას სრულ მხარდაჭერას და ვითანამშრომლებთ შესაბამის ორგანოებთან, რათა, სადაც შესაძლებელია, გამოვავლინოთ პასუხისმგებელი პირები. თუმცა ტვირთი არ შეიძლება კვლავ მოთამაშეებსა და კლუბებზე დარჩეს, რომ რეაგირება მოახდინონ უკვე მიყენებული ზიანის შემდეგ.
მიმდინარე მდგომარეობა აღარ შეიძლება გაგრძელდეს. მას უნდა დაუპირისპირდნენ, გამოწვევა გაუკეთონ და აღმოფხვრან, არა ხვალ, არამედ ახლა.“ - წერია მერსისაიდელთა განცხადებაში.
ფრანგმა ფეხბურთელმა სხვადასხვა ონლაინ პლატფორმაზე შეურაცხყოფის ნიაღვარი მიიღო, რომლის სიმძიმემაც მისი კლუბი აიძულა განცხადება გაევრცელებინა და დაეგმო ეს თავდასხმები.
კონატეს ორთაბრძოლა გალათასარაის თავდამსხმელ ვიქტორ ოსიმენთან, რომლის შედეგადაც ფორვარდი უხერხულად დაეცა და ხელის ტრავმა მიიღო, როგორც ჩანს, იმ ონლაინ შეურაცხყოფის გამომწვევი მიზეზი გახდა, რაზეც ლივერპულმა სწრაფად მოახდინა რეაგირება.
