სტრიკლენდი თეთრი სახლის ტურნირზე დასასწრებად ფანებს სთხოვს ბილეთს

შონ სტრიკლენდი, UFC-ის საშუალო წონის მოქმედი ჩემპიონი, ამჟამად ვაშინგტონში იმყოფება, თუმცა ისტორიულ ღონისძიებაზე, UFC Freedom 250-ზე დასწრებას ვერ ახერხებს.

ეს ღონისძიება, რომელიც თვეების განმავლობაში იგეგმებოდა, კვირას თეთრი სახლის გაზონზე უნდა ჩატარდეს. მიუხედავად იმისა, რომ UFC-ის ფანები მას მოუთმენლად ელიან, ღონისძიება საკმაოდ დახურულია. ის ღია მხოლოდ 4500 ადამიანისთვის იქნება, რომლებიც უშუალოდ UFC-ისა და დონალდ ტრამპის გუნდის მიერ იქნენ შერჩეულნი.

შონ სტრიკლენდი, რომელიც თავისი პირდაპირი და ხშირად სკანდალური ხასიათითაა ცნობილი, მათ შორის აღმოჩნდა, ვინც ამ ღონისძიებაზე ვერ მოხვდა. თავდაპირველად სტრიკლენდს ბილეთი მიღებული ჰქონდა, რის გამოც მან ვაშინგტონში გამგზავრება დაგეგმა, თუმცა მოგვიანებით მას აცნობეს, რომ თეთრი სახლის მხრიდან უსაფრთხოების ნორმების გამო თეთრ სახლში აღარ დაიშვებოდა.

თავად სტრიკლენდი ამ აკრძალვას პოლიტიკურ მიზეზებს უკავშირებს. ის ღიად საუბრობს იმაზე, რომ ეს გადაწყვეტილება, სავარაუდოდ, მის მიერ დონალდ ტრამპის მისამართით გაკეთებული ირონიული და მკაცრი კომენტარების გამო მიიღეს. მან საჯაროდ დასცინა ტრამპს და ასევე ახსენა ე.წ. Epstein files, რამაც, მისი თქმით, ტრამპის გუნდის გაღიზიანება გამოიწვია.

ჩემპიონი არ აპირებს დანებებას. მას შემდეგ, რაც გაირკვა, რომ მთავარ ღონისძიებაზე ვერ მოხვდებოდა, მან სოციალურ ქსელ X-ზე თაყვანისმცემლებს დახმარება სთხოვა. ის ეძებს დამატებით ბილეთს, რათა დაესწროს თეთრი სახლის მოპირდაპირედ, ელიფსის პარკში დაგეგმილ ფან-ზონას, სადაც დაახლოებით 80 000 გულშემატკივარი შეიკრიბება მუსიკალური ღონისძიებებისა და დიდი ეკრანებისთვის.

სტრიკლენდმა იუმორისტულად დასძინა, რომ ეს მოგზაურობა მისთვის მაინც სახალისოა, მიუხედავად იმისა, რომ ბილეთების ფულის დაბრუნებას ვერ ახერხებს და ახლა ვაშინგტონში სავარჯიშო დარბაზებს ეძებს დროის გასატარებლად.