მძიმე წონის ტოპ-კონტენდენტებმა, ალექსანდრ ვოლკოვმა და ვალდო კორტეს-აკოსტამ, ნიუარკში გამართულ Prudential Center-ში გულშემატკივრების მოლოდინები ვერ გაამართლეს.
რეიტინგის მეორე და მეოთხე ნომრებს შორის ბრძოლა დაძაბული უნდა ყოფილიყო, თუმცა რეალობა სხვაგვარი აღმოჩნდა.
რუსი მებრძოლი მთელი ბრძოლის განმავლობაში ძირითადად ჯებებით მუშაობდა და დისტანციას ინარჩუნებდა, მაშინ როცა მისი მეტოქე მას აქტიური შეტევისკენ მოუწოდებდა. მებრძოლებმა ტემპს მხოლოდ მესამე რაუნდში მოუმატეს, თუმცა ეს საკმარისი არ აღმოჩნდა სანახაობრივი ბრძოლისთვის. საბოლოოდ, ვოლკოვმა მსაჯების ერთსულოვანი გადაწყვეტილებით გაიმარჯვა.
პირველივე წუთებიდან ვალდო კორტეს-აკოსტას უჭირდა ვოლკოვის მასიურ გაბარიტებთან გამკლავება და დისტანციის შემოკლება. მართალია, აკოსტამ მეტოქისთვის სისხლის დენა შეძლო, მაგრამ ვოლკოვის პროვოცირება და საკუთარი რიტმის პოვნა მაინც ვერ მოახერხა.
Prudential Center-ში შეკრებილმა ფანებმა საკუთარი უკმაყოფილება მაშინვე გამოხატეს, როგორც კი ბრიუს ბაფერმა გამარჯვებულად ვოლკოვი გამოაცხადა. დარბაზში ისეთი სტვენა და ხმაური იყო, რომ ოქტაგონზე ჯო როგანთან ინტერვიუს დროს რუსი მებრძოლის ხმა ძლივს ისმოდა. ვოლკოვმა აღნიშნა, რომ მომავალში ალექს პერეირასთან ბრძოლა აინტერესებს.
