ევროპის 21-წლამდე ჩემპიონატის ჯგუფური ეტაპის მე-2 მატჩში საფრანგეთთან დასანანი მარცხის შემდეგ, საქართველოს ნაკრების მთავარმა მწვრთნელმა, რამაზ სვანაძემ, განვლილი შეხვედრა შეაფასა.
მატჩი ფრანგების გამარჯვებით, 3:2 დასრულდა, გადამწყვეტი გოლი მამლებმა მსაჯის მიერ დამატებულ დროში გაიტანეს.
„პირველ ტაიმში ჩვენივე შეცდომის გამო დავისაჯეთ და ზოგადად, ჩვენივე შეცდომებით აგვერია თამაში. წინა პრესკონფერენციაზე ბევრი ვილაპარაკე ინდივიდუალურ შეცდომებზე. პირველ ტაიმში იყო ეპიზოდები, განსაკუთრებით ჩვენს ნახევარზე, როცა გაუმართლებლად ვკარგავდით ბურთს.
ასეთი დონის გუნდები მსგავს შეცდომებს არ პატიობენ და ამას ფსიქოლოგიურადაც დიდი მნიშვნელობა აქვს. როცა შენს ნახევარზე ამდენ ბურთს კარგავ, ფსიქოლოგიურადაც გიჭირს. ყველაზე სამწუხარო ისაა, რომ ნაკლებად ვასრულებდით იმას, რაც დამუშავებული გვქონდა, თუნდაც ბურთის ამოტანის მხრივ. პირველ ტაიმში მხოლოდ ორჯერ ამოვედით ისე, როგორც ვგეგმავდით და ამის შედეგად სახიფათოდაც შევუტიეთ.
შესვენებაზე საუბარი გვქონდა იმაზე, თუ რა დონის გუნდს ვეთამაშებოდით და რამხელა მნიშვნელობა აქვს ტაქტიკური მონახაზის შესრულებას. გვქონდა ფსიქოლოგიური საუბარიც ფეხბურთელებთან და ყველამ დაინახა, რომ მეორე ტაიმში მოედანზე უკვე სულ სხვა გუნდი ვიყავით, მაგრამ სამწუხაროდ მაინც დავმარცხდით." - აღნიშნა სვანაძემ.
