კონფერენს ლიგის მე-2 საკვალიფიკაციო ეტაპის პირველი მატჩის წინ, ჟალგირის ვილნიუსის წინააღმდეგ, დინამო თბილისის მთავარმა მწვრთნელმა, თემურ ქეცბაიამ პრესკონფერენცია გამართა.
"ჩვენმა მეტოქემ პირველი წრე საკმაოდ მარტივად გაიარა. ხელოვნურ საფარზე თამაშობენ და ეს მათ უპირატესობად შეიძლება ჩაითვალოს. ლიეტუვის ჩემპიონატი მიმდინარეობს და კარგ ფორმაში არიან, თუმცა, ვფიქრობ, ჩვენც თანადათან უკეთეს კონდიციებში შევდივართ.
რამდენიმე უცხოელი ფეხბურთელი დავიმატეთ, მოლაპარაკებები ქართველებთანაც გვქონდა, თუმცა შეთანხმება ვერ მოხერხდა. გუნდში ისედაც ბევრი ქართველი ფეხბურთელი გვყავს და არ გვინდა, ისეთები დავიმატოთ, ვინც კარიერას 1-2 წელში დაასრულებენ. გვირჩევნია, შანსი მივცეთ ახალგაზრდებს, რომლებიც ჩვენთან მრავლად არიან.
იმედი მაქვს, სტადიონზე იმაზე მეტი გულშემატკივარი მოვა, ვიდრე წინა თამაშზე. კარგ თამაშს ველოდები", - აღნიშნა ქეცბაიამ.
დინამო თბილისისა და ჟალგირის ვილნიუსის მატჩი 23 ივლისს, 21:00 საათიდან, მიხეილ მესხის სახელობის სტადიონზე გაიმართება.
