ლიდერის ხიბლი, Lego და „Believe“ — როგორ აშენებს ლიამ როსენიორი ახალ „ჩელსის“.
„ტედ ლასოს“ სერიალის გმირი მაყურებელს სწორედ იმ თვისებებით შეუყვარდა, რაც თანამედროვე ფეხბურთშიც სულ უფრო ფასობს — ადამიანურობით, გუნდური სულის შექმნით და დეტალებზე ზრუნვით: პატარა რიტუალები, მარტივი სიტყვები, მოტივაციური ჟესტები და ის ცნობილი წარწერა Believe გასახდელში.
დღეს „ჩელსიში“ ასეთივე ფილოსოფიის მატარებელი მწვრთნელი გამოჩნდა. ლიამ როსენიორი პირველივე დღეებიდან ცდილობს კოლექტივის შეკვრას არა ხმამაღალი სიტყვებით, არამედ პატარა, მაგრამ მნიშვნელოვნი ნაბიჯებით — ჩახუტება ფეხბურთელებთან, ინდივიდუალური საუბრები, გუნდური აქტივობები და ზოგჯერ სრულიად არაორდინარული იდეებიც.
ამის შესახებ დეტალურად წერს Daily Mail-ის ჟურნალისტი კირან გილი, რომლის სტატიას თავად როსენიორიც გაეცნო:
„წამაკითხეს ძალიან კარგი სტატია, რომელიც ნამდვილად მომეწონა“, — თქვა მწვრთნელმა.
ის არ არის დიქტატორი
როსენიორმა თავიდანვე გააცნობიერა, რომ ფეხბურთელებს არ უყვართ გრძელი თეორიული შეხვედრები და რთული ტაქტიკური მონოლოგები. ამიტომ გუნდური შეკრებები მოკლე და საქმიანი აქვს, ხოლო მთავარ აქცენტს ინდივიდუალურ საუბრებზე აკეთებს.
მისი კაბინეტის კარი ყოველთვის ღიაა. როსენიორი პირადად ესაუბრება მოთამაშეებს, არკვევს მათ მდგომარეობას და ერთად აყალიბებს გეგმას.
მაგალითად, კოულ პალმერთან პირველივე შეხვედრაზე ჯანმრთელობაზე გაამახვილა ყურადღება და უთხრა, რომ გადატვირთვა დაუშვებელია. მეკარე სანჩესს აუხსნა, რომ შეცდომის შემთხვევაში პასუხისმგებლობას თავად აიღებს და საჯაროდ დაიცავს.
ესტევაო როსენიორმა შეაქო არა მხოლოდ თამაშის გამო, არამედ ინგლისურის გაუმჯობესებისთვისაც, ხოლო კაისედოსთან ოცნებებზე ისაუბრა — მწვრთნელს სურს, რომ ათი წლის შემდეგ ეკვადორელი მაკელელესა და კანტეს გვერდით მოიხსენიონ.
„როსენიორი აფასებს სხვის აზრს. ის არ არის დიქტატორი. მატჩის გეგმას არჩევამდე ისმენს ფეხბურთელებს, რადგან სწორედ მათ უნდა შეასრულონ ეს გეგმა“, — წერს კირან გილი.
ემოციური მხარდაჭერა და რეაქცია შეცდომებზე
ვარჯიშებზე განსაკუთრებული ყურადღება ეთმობა გუნდის რეაქციას შეცდომებზე. ბურთი დაკარგე? არაუშავს — დაბრუნდი და იბრძოლე.
როსენიორი ხშირად იმეორებს: არ იწუწუნო. არ იზარმაცო. დაეხმარე პარტნიორს და ისიც დაგეხმარება.
თუ რამე მოსწონს — ხმამაღლა აქებს ფეხბურთელებს, აპლოდისმენტებით (სპეციალურად ხელთათმანების გარეშე, რომ ხმა მკაფიო იყოს). ხშირად ეხუტება, მხარზე ხელს ადებს და სიტყვით ამხნევებს. ახალგაზრდა მოთამაშეებისთვის ეს მიდგომა განსაკუთრებით მნიშვნელოვანია.
ჰიგიენის გაკვეთილი, ოღონდ იუმორით
ერთ-ერთი ვირუსის გავრცელების შემდეგ როსენიორმა ფეხბურთელებს ელემენტარული ჰიგიენის აუცილებლობაზეც კი ესაუბრა — მათ შორის ხელების დაბანაზე.
თუმცა საუბარი იუმორით წარიმართა. იდეა მარტივია: ფეხბურთელები ბავშვები არ არიან, მაგრამ ზოგჯერ ყველაზე მარტივ საკითხებზეც შეხსენება საჭიროა.
Lego-თიმბილდინგი
როსენიორის ერთ-ერთი საყვარელი მეთოდი გუნდური ქიმიის გასაძლიერებლად Lego-ს კონსტრუქტორების ერთობლივი აწყობაა.
გეგმის მიხედვით, ფეხბურთელები ერთ დღეს ვარჯიშის ნაცვლად სპეციალურ ოთახში შეიკრიბებიან და გუნდებად დაიწყებენ Lego-ს აწყობას. იდეა მარტივია — ერთად შექმნა, ერთად გაიცინო და ცოტა ხნით დაივიწყო ზეწოლა.
„ჩელსიში“ ეს ჯერ არ ჩატარებულა დატვირთული გრაფიკის გამო, თუმცა კონსტრუქტორები უკვე შეკვეთილია.
საიდან მოდის ასეთი მიდგომა?
როსენიორის დედა სოციალური მუშაკი იყო და ოჯახში ხშირად ჰყავდათ უცხო ბავშვები. ლიამი ასეთ გარემოში გაიზარდა და ადრეულ ასაკში ისწავლა სხვების გაგება.
ის გაიზარდა მულტიკულტურულ უბანში, თავადაც არაერთხელ შეხვედრია რასიზმს, თუმცა ეს სიძულვილში არ გადაეზარდა — პირიქით, ჩამოუყალიბდა რწმენა, რომ ადამიანები ერთნაირები არიან, უბრალოდ განსხვავებული კულტურებით.
ადამიანი სქემაზე წინ დგას
როსენიორი მიიჩნევს, რომ ფეხბურთში პირველ რიგში ადამიანი დგას და მხოლოდ შემდეგ — ტაქტიკა.
„თუ მწვრთნელი ფეხბურთელებს ადამიანურად ექცევა, გუნდი ამას უკან აბრუნებს“, — ასეთია მისი პრინციპი. ამიტომ მან თავიდანვე ესაუბრა მათ, ვინც ადრე ნაკლებად თამაშობდა და აუხსნა, რომ ყველას სუფთა ფურცლიდან ეძლევა შანსი.
manage - man და age
როსენიორი საკუთარ თავს ასე აღწერს:
„მე ვარ როგორც მწვრთნელი, ისე მენეჯერი. სიტყვა manage რომ შუაზე გაყო, გამოდის სიტყვები man და age, ანუ ეხმარები ადამიანებს ზრდაში. სწორედ ეს არის ჩემი საქმე“.
ჩელსიში ახალი ეპოქა იწყება არა მხოლოდ ტაქტიკური ცვლილებებით, არამედ კულტურით, სადაც ნდობა, პატივისცემა და ადამიანურობა მთავარი ღირებულებებია.
