სლოვაკეთის ჩემპიონატის ნაიკის ლიგა მორიგ ტურში ქართველმა მცველებმა თავი შესანიშნავი თამაშით გამოიჩინეს და საკუთარ გუნდებში საუკეთესოები იყვნენ.
თორნიკე ძოწენიძის მიხალოვცემ საკუთარ მოედანზე ბანსკა ბისტრიცას მინიმალური ანგარიშით, 1:0 სძლია.
ქართველი მცველი მასპინძელთა ძირითად შემადგენლობაში იყო, შეუცვლელად იასპარეზა და მაღალი შეფასება - 7,7 ქულა დაიმსახურა.
კიდევ უფრო შთამბეჭდავი მატჩი ჰქონდა სანდრო ნარიმანიძეს. მისმა ჟილინამ ტრენჩინთან დაძაბულ ბრძოლაში 2:1 გაიმარჯვა. 21 წლის ქართველმა მცველმა შეუცვლელად ითამაშა, მატჩში უმაღლესი შეფასება (8,9 ქულა) მიიღო და შეხვედრის საუკეთესო მოთამაშე გახდა.
ნარიმანიძე აქტიურად ერთვებოდა შეტევებშიც და რამდენჯერმე შორეული დარტყმითაც სცადა გატანა, თუმცა მეტოქის კარის აღება ამჯერად ვერ მოახერხა.
