27სექტემბერს, თბილისის ოლიმპიურ სასახლეში, MMA-ის მსოფლიო ჩემპიონატი დაიწყო. შერეული საბრძოლო ხელოვნების საერთაშორისო ფედერაციის მიერ ორგანიზებულ ტურნირში 57 ქვეყნის 781 ათლეტი მონაწილეობს.
საქართველოს ნაკრები თითოეულ წონაში 2-2 სპორტსმენითაა წარმოდგენილი და ჯამში 36 ათლეტი ჰყავს (34 მამაკაცი და 2 ქალი). 1/16 ფინალურ ეტაპზე მონაწილეობა იუნიორებსა და უფროსებში 9-9 ქართველმა მიიღო.
იუნიორთა შორის 1/8 ფინალის საგზური 5-მა მათგანმა მოიპოვა - თამაზ შავაძემ (56,7 კგ), თემურ მარტიაშვილმა (61,2 კგ), ივანე კვირიკაშვილმა (65,8 კგ), ზაურ გაჯიევმა (70,3 კგ) და გოგა მიდელაშვილმა (70,3 კგ).
უფროსებში 1/8 ფინალში 8 ქართველი გავიდა - აკაკი ჩუხაშვილი (56,7 კგ), კობა ჭუმბურიძე (61,2 კგ), ბექა შაინიძე (65,8 კგ), გიორგი ჩხეტია (74,8 კგ), ლექი ალდამოვი (79,4 კგ) და რომან ჩოჩიშვილი (83,9 კგ). კიდევ ორი საგზური მიიღეს ოთარ ხუჭუამ (61,2 კგ) და გიორგი წიფიანმა (83,9 კგ), რომელთაც მეტოქეები არ გამოუცხადდათ.
საქართველო MMA-ის მსოფლიო ჩემპიონატს ისტორიაში პირველად მასპინძლობს. ტურნირი 1/8 ფინალური ბრძოლებით გაგრძელდება და 2 ოქტომბერს ფინალებით დასრულდება.
