"თითოეული ჩვენგანი ვმუშაობთ, რომ წარმატებულ გზაზე დავბრუნდეთ" - კიტეიშვილი

2026 წლის მსოფლიო ჩემპიონატის შესარჩევის ეტაპის ბოლო შეხვედრის წინ, ბულგარეთსა და საქართველოს შორის, ვილი სანიოლთან ერთად, მატჩისწინა პრესკონფერენციაზე ოთარ კიტეიშვილი იმყოფებოდა და მედიასთან კომენტარი გააკეთა.

"საკვალიფიკაციო ეტაპის დაწყებამდე განსხვავებული მოლოდინები გვქონდა, თუმცა არსებული მდგომარეობა ჩვენთვის დიდი გამოწვევაა. ამ სიტუაციიდან გამოსავალი ერთად უნდა ვიპოვოთ, და ამაზე მუშაობა მიმდინარეობს. განსაკუთრებით ამ შეკრებაზე იგრძნობა, რომ ერთი მიზანი გვაქვს - დავბრუნდეთ წარმატებულ გზაზე. გუნდის თითოეული წევრი მზად არის ამაში საკუთარი წვლილი შეიტანოს.

გიორგი ჩაკვეტაძე განსაკუთრებული ფეხბურთელია. კარიერის დასაწყისში, დინამოს შემადგენლობაში, ერთად გვიწევდა თამაში და კარგად ვიცით ერთმანეთის თვისებები. ტრავმები ფეხბურთის ნაწილია და სამწუხაროდ ხშირად ხდება. რა თქმა უნდა, ჩაკვეტაძე უდიდესი დანაკლისია და ყველას გვინდა, რომ ჩვენთან ერთად იყოს, თუმცა გუნდში არიან ფეხბურთელები, რომლებიც მზად არიან მოედანზე მაქსიმუმი გამოავლინონ და წარმოაჩინონ საკუთარი შესაძლებლობები", - თქვა კიტეიშვილმა.

გრაცის შტურმის ვიცე-კაპიტანმა ნაკრებში 50-ე შეხვედრა ესპანეთთან ჩაატარა - აქტივში 4 გოლი და 9 ასისტი აქვს. ჩვენი ნაკრების ისტორიაში მასზე მეტი საგოლე პასი 3 ფეხბურთელს აქვს - გიორგი ჩაკვეტაძესა და ხვიჩა კვარაცხელიას (10-10) და ყველა დროის რეკორდსმენ გოჩა ჯამარაულს (14).

ბულგარეთისა და საქართველოს ეროვნული გუნდები სოფიის ვასილ ლევსკის სახელობის სტადიონზე, თბილისის დროით 23:45 საათიდან ითამაშებენ.

გუნდები ერთმანეთის წინააღმდეგ მე-10 ურთიერთშეხვედრას გამართავენ - 3 მოგება ჩვენ, 4 ბულგარელებს და 2 ფრე.