,,წარმატებები თეთრ სახლში" - ოლივეირა თოფურიას სიტყვებს გამოეხმაურა

ილია თოფურია პატივს სცემს ჩარლზ ოლივეირას უნარს, ყოველი მარცხის შემდეგ კიდევ უფრო გაძლიერებული დაბრუნდეს.

„მაქს ჰოლოუეისთან ბოლო ბრძოლაში მან ძალიან გამაკვირვა. ბრძოლაში მისი მონდომება, ყველაფრის მიმართ სრული კონცენტრაცია და საკუთარი თავის მიმართ უდიდესი რწმენა შთამბეჭდავი იყო.

სინამდვილეში, ამ ბიჭს ლომის გული აქვს, რადგან ასეთ დამოკიდებულებას ხშირად ვერ შეხვდები.

როდესაც მებრძოლი UFC-ში მარცხდება, ხშირად ხედავ, როგორ კარგავს აურას და საკუთარ თავში რწმენას. მაგრამ ჩარლზი განსაკუთრებული მენტალიტეტისა და განსაკუთრებული გულის პატრონია.

მის მიმართ მხოლოდ პატივისცემა მაქვს. ძალიან მომწონს ეს ბიჭი.“ - თოფურიას სიტყვებს Ag. Fight ციტირებს.

ქართველი ჩემპიონის ნათქვამს სოციალურ ქსელ X-ზე ოლივეირა გამოეხმაურა.

„მადლობა, ილია. ყოველი მარცხის შემდეგ ვცდილობ, როგორც მენტალურად, ისე ტექნიკურად გავაუმჯობესო საკუთარი თავი.

მთავარია, კონცენტრაცია არ დავკარგო და გაკვეთილები გამოვიტანო იმ ბრძოლებიდან, სადაც მეტოქემ ჩემზე უკეთ იასპარეზა.

წარმატებებს გისურვებ UFC-ის თეთრი სახლის ღონისძიებაზე.

ღმერთმა დაგლოცოთ ყველა და სასიამოვნო შაბათ-კვირას გისურვებთ.“ - წერს ბრაზილიელი.