მიკელ არტეტას გუნდის მაქსიმალური მობილიზება სჭირდება პრემიერ ლიგის დარჩენილ ხუთ თამაშში.
იგი იმედოვნებს, რომ არსენალის ფეხბურთელები დღეს ვარჯიშს დასვენებულები დაუბრუნდებიან და მზად იქნებიან პრემიერ ლიგის ტიტულისთვის საბრძოლველად. კვირას მანჩესტერ სიტისთან მარცხის შემდეგ, გუნდს ორდღიანი დასვენება მიეცა, რაც არტეტას ჩვეული ინტენსიური მიდგომისგან განსხვავებული ნაბიჯია.
ვინაიდან ამ სეზონში მეთოფეები ოთხივე ტურნირზე შორს წავიდნენ, ბოლო თვეების განმავლობაში ფეხბურთელებს ძალების აღდგენის შანსი იშვიათად ეძლეოდათ. არტეტამ ისნი ორდღიანი დასვენებით იანვარში, ინტერთან გამარჯვების შემდეგაც დააჯილდოვა, რაც ზედიზედ ოთხი გასვლითი მატჩის შემდეგ მოხდა. ზოგადად, მთელი სეზონის განმავლობაში ტემპი არ დაცემულა 22 წლის განმავლობაში პირველი საჩემპიონო ტიტულის მოპოვების მოლოდინში.
ეს კვირა არსენალისთვის იშვიათად თავისუფალი აღმოჩნდა, რადგან ის ინგლისის თასიდან საუთჰემპტონმა მეოთხედფინალში გამოთიშა. არტეტა ხშირად საუბრობდა ამ სეზონში მოთამაშეების ფიზიკურ და მენტალურ გადაღლაზე და სწორედ ამიტომ გამოიყენა შანსი, რომ მათთვის დამატებითი დრო მიეცა. გუნდი დღეს ბრუნდება საწვრთნელ ცენტრში, რათა შაბათს ნიუკასლთან მნიშვნელოვანი მატჩისთვის დაიწყოს მზადება.
თუ სიტი დღეს ბერნლის დაამარცხებს, ისინი სატურნირო ცხრილში პირველ ადგილზე გადავლენ ბურთების უკეთესი სხვაობით, სეზონის დასრულებამდე ხუთი ტურით ადრე. ეს ნიშნავს, რომ ორივე გუნდს ფინიშზე მხოლოდ გამარჯვებები დასჭირდება, თანაც დაჯერებული გამარჯვებები.
არტეტამ მომდევნო დღეებში შესაძლოა პოზიტიური ამბებიც მიიღოს შემადგენლობასთან დაკავშირებით. იურიენ ტიმბერი და ბუკაიო საკა ტრავმების შემდეგ დაბრუნებას ცდილობენ. იმედოვნებენ, რომ საკა ამ კვირაში მოედანზე სირბილს დაიწყებს და თუ ტკივილს არ იგრძნობს, მისი რეაბილიტაცია დაჩქარდება. ტიმბერი კი, საზარდულის ტრავმის შემდეგ, მოედანზე დასაბრუნებლად უკვე მზადაა.
