წყვილთა ფინალშია - გორგოძე კიდევ ერთი ტიტულისკენ მიიწევს

ეკო გორგოძე კოლუმბიის ქალაქ კალიში მიმდინარე ჩელენჯერის ტიპის ტურნირზე, წყვილთა შორის, ფინალში გავიდა.

ქართველი ჩოგბურთელი იტალიელ ნიკოლ ფოსა უერგოსთან ერთად თამაშობს და ტურნირზე პირველ ნომრადაა განთესილი. ქართულ-იტალიური დუეტი სტატუსს ამართლებს - 1/4 ფინალური და 1/2 ფინალური მატჩები სუპერ დამაჯერებლად მოიგეს.

გორგოძე-უერგომ 1/4 ფინალში კორტზე 56 წუთი გაატარა და 6:3; 6:1 (სებაიოსი / ზოლოტარევა) გაიმარჯვა, ხოლო 1/2 ფინალური შეხვედრა საათსა და 4 წუთში დაასრულა - 6:2; 6:3 (გამისი / ვედერი).

ეკოსა და მისი იტალიელი მეწყვილის დუეტი ფინალში ბრაზილიელებს, კანდიოტოსა და პიგოსის შემადგენლობით, შეხვდებიან და ტიტულის მოპოვებას შეეცდებიან.

შეგახსენებთ, გორგოძე-უერგოს წყვილმა ოქტომბრის დასაწყისში იტალიის ქალაქ რენდეში გამართული ტურნირი მოიგო. მას შემდეგ კი ეკომ, ესპანელ ირენე ბურიოსთან ერთად, ზედიზედ ორი ტურნირის ფინალში ითამაშა და ახლა წყვილებში კიდევ ერთი, ზედიზედ მე-3 ტურნირის ფინალშია.