ცუდი ამბავი ავსტრიიდან: საქართველოს ნაკრების ნახევარმცველმა ოპერაცია გაიკეთა

საქართველოს ეროვნული ნაკრებისა და ავსტრიული ვოლფსბერგერის ახალგაზრდა ნახევარმცველს, ოთარ მამაგეიშვილს იძულებითი პაუზის აღება მოუწია.

ფეხბურთელმა ბარძაყის უკანა კუნთის გაწყვეტის გამო ოპერაცია გაიკეთა. ქართული საფეხბურთო გვერდის, Geo Team-ის ცნობით, ქირურგიულმა ჩარევამ წარმატებით ჩაიარა.

პრობლემები ქართველი შემტევისთვის ჯერ კიდევ სექტემბერში, ეროვნული გუნდის სადებიუტო შეკრებაზე დაიწყო, რის გამოც მას ნაკრების ბანაკის ნაადრევად დატოვება მოუხდა. ავსტრიაში დაბრუნების შემდეგ ოთომ ძალები მოსინჯა და 1 ნოემბერს, გრაცის შტურმის (სადაც მისი ტყუპისცალი გიზი მამაგეიშვილი და ოთარ კიტეიშვილი ასპარეზობენ) წინააღმდეგ 27 წუთი ითამაშა. თუმცა, ტრავმამ კვლავ იჩინა თავი და 6 ნოემბერს, ვენის რაპიდთან მატჩი მან უკვე გამოტოვა.

განახლებული ტრავმის სირთულიდან გამომდინარე, ქართველ ლეგიონერს სარეაბილიტაციოდ დაახლოებით 4 თვე დასჭირდება. ეს კი იმას ნიშნავს, რომ მამაგეიშვილი მწვანე მინდორს, სავარაუდოდ, მხოლოდ მომავალი წლის მარტში დაუბრუნდება.