ინგლისის ეროვნული ნაკრების მთავარმა მწვრთნელმა, თომას ტუხელმა განაცხადა, რომ ჯუდ ბელინგემს მსოფლიო ჩემპიონატზე სასტარტო შემადგენლობაში ადგილი გარანტირებული არ აქვს.
22 წლის ვარსკვლავმა მადრიდის რეალში საკმაოდ არასტაბილური სეზონი ჩაატარა (40 მატჩში 8 გოლი) და ტრავმებისა თუ სხვა მიზეზების გამო, ნაკრების საკვალიფიკაციო ეტაპის მხოლოდ ოთხ შეხვედრაში მიიღო მონაწილეობა.
ბელინგემს ნაკრების ათი ნომრის პოზიციაზე სერიოზულ კონკურენციას მორგან როჯერსი უწევს, რომელმაც საკვალიფიკაციო ეტაპის ყველა, რვავე მატჩში ითამაშა. როჯერსმა ასტონ ვილას რიგებში ბრწყინვალე სეზონი ჩაატარა - 14 გოლითა და 11 ასისტით ბირმინგემელებს ჩემპიონთა ლიგის საგზური მოუპოვა და ევროპა ლიგა მოაგებინა, რის გამოც ტუხელის სრული ნდობა დაიმსახურა.
მიუხედავად იმისა, რომ ახალ ზელანდიასთან 1:0 მოგებულ ამხანაგურ მატჩში ბელინგემმა მეორე ტაიმში გუნდს კაპიტნის სამკლაურითაც კი გაუძღვა, ტუხელი აღნიშნავს, რომ ნაკრებში 14-15 პოტენციური სასტარტო მოთამაშეა და როტაცია გარდაუვალი იქნება.
გერმანელმა სპეციალისტმა ისიც დაამატა, რომ ჯუდი ვარჯიშებზე კარგად გამოიყურება, ტრავმის შემდეგ დასვენებულია და მოედანზე გასვლის დიდი შიმშილი აქვს.
