ინგლისის ნაკრების მთავარმა მწვრთნელმა, თომას ტუხელმა განაცხადა, რომ გასულ ზაფხულს ივან ტონის საქციელით უკმაყოფილო იყო და მსოფლიო ჩემპიონატის განაცხადში მის შეყვანამდე ფეხბურთელთან ურთიერთობის დასარეგულირებლად სერიოზული საუბარი დასჭირდა.
30 წლის თავდამსხმელის გამოძახება ნაკრების შემადგენლობაში ყველაზე მოულოდნელი აღმოჩნდა, განსაკუთრებით ფილ ფოდენის, კოულ პალმერისა და ტრენტ ალექსანდერ-არნოლდის არყოფნის ფონზე.
გასული წლის ივნისში სენეგალთან ამხანაგურ მატჩში ორწუთიანი თამაშის შემდეგ, ტუნის ალ-აჰლის თავდამსხმელი ნაკრებს მიღმა დარჩა. ტუხელი აღიარებს, რომ ფეხბურთელის გამოძახებას საერთოდ არ გეგმავდა მისი ვარჯიშის დონისა და არასაკმარისი ერთგულების გამო, თუმცა რამდენიმე კვირის წინ სიტუაცია შეიცვალა.
ივნისის შეკრებით უკმაყოფილო ვიყავი, რაც მან კარგად იცოდა. სიტუაციის გარკვევა პირველი ნაბიჯი იყო იმისთვის, რომ მისი დაბრუნება საერთოდ განგვეხილა. ჩვენ ვისაუბრეთ, ყველა პრობლემა მოვაგვარეთ და საკითხი დაიხურა
ტუხელის თქმით, ნაკრების კაპიტან ჰარი კეინს მოსწონს ტონის სათამაშო სტილი, რომელიც მცველების ყურადღებას თავისკენ იზიდავს. მწვრთნელმა ასევე ხაზი გაუსვა ტონის მაღალ კლასს პენალტების შესრულებისას და სტანდარტულების დროს. ინგლისის ნაკრები ტონის ჩრდილოეთ ამერიკაში დაგეგმილ მსოფლიო ჩემპიონატზე ძირითადად მატჩის ბოლო წუთებზე გარდატეხის შესატანად გამოიყენებს. ტუხელმა მას ნაკრების სპეციალური დანიშნულების გუნდის წევრი უწოდა, რომელიც მოედანს მიღმაც ბრწყინვალე ატმოსფეროს ქმნის.
