ესპანეთეთის ქალაქ ლინარესში მიმდინარე ჭადრაკის გუნდურ მსოფლიო ჩემპიონატზე, საქართველოს ქალთა ნაკრები შესანიშნავად თამაშობს და ტურნირის B პულის უდანაკარგო ერთპიროვნული ლიდერია.
ჩვენმა ნაკრებმა უზბეკეთის, ინდოეთის, უკრაინისა და ჩინეთის ნაკრებები ზედიზედ დაამარცხა, 8 ქულა აქვს და პულის გამარჯვებულის სტატუსი დასრულებამდე 1 ტურით ადრე აქვს განაღდებული.
ჩვენი გუნდი დღეს პულის ბოლოადგილოსან საფრანგეთის ნაკრებს შეხვდება. სავარაუდოდ, თავის გამოჩენა სათადარიგო მოთამაშეებს მიეცემათ. უკვე ნახსენები ოთხეულის გარდა, ტურნირის განაცხადში ანასტასია კირთაძე და კესარია მგელაძე არიან.
ინფორმაციისთვის გეტყვით, რომ პულიდან პლეი-ოფში 4 ნაკრები გადის, რის შემდეგაც ჯამში 8 გუნდი ერთმანეთს ნოკაუტ-ფორმატით შეხვდება.
საქართველოს ნაკრები მსოფლიო ჩემპიონატის მოქმედი გამარჯვებულია, ჯამში კი ტიტული 2-ჯერ აქვს მოგებული - 2015 და 2023. ბრინჯაოს მედალს კი 2010; 2011; 2017 და 2021 წლებში დაეუფლნენ.
