"უნდა იყო ისეთი სასტიკი, როგორიც მაქსია" - ჰამილტონის რჩევა პიასტრისა და ნორისს

ლუის ჰამილტონს ჰკითხეს თუ რა რჩევას მისცემდა ოსკარ პიასტრისა და ლანდო ნორისს, რომლებიც თავიანთი პირველი ჩემპიონობისთვის იბრძვიან ისეთ მეტოქესთან, როგორიც მაქს ვერსტაპენია.

„ეს მათი პირველი ჩემპიონატი არ არის. ცხადია, მათ უკვე მოიგეს ჩემპიონატები სხვა კატეგორიებში. ასე რომ, ეს რაღაც ახალი არ არის... არ ვიცი... მე ის ადამიანი არ ვარ, ვინც აუცილებლად უნდა აძლევდეს რჩევებს სხვებს.

მაგრამ ეს სიტუაცია, როცა გუნდში ხარ, ძალიან რთულია. ზეწოლა დიდია. ეს ნამდვილად ის დროა, როცა უნდა მოიშორო ყველაფერი ზედმეტი, უნდა ‘დახუჭო თვალები’. უნდა დაბლოკო აბსოლუტურად ყველაფერი გარედან, ძალიან ბევრი რამ მოდის შენამდე, როგორც დადებითი, ისე უარყოფითი.

მართლაც უნდა იყო სასტიკი. აი, ზუსტად ისეთი, როგორიც მაქსია. ის მათგან წაიღებს ყველაფერს, თუ ისინი იმავეს არ იზამენ. ისინი უნდა მიაწვნენ მაქსიმალურად. უნდა იპოვონ ძალა თავში, რომ შეებრძოლონ ისეთ ადამიანს, როგორიც მაქსია იმ მანქანაში, რომელშიც ახლა ზის.

საბოლოოდ მთავარი სტაბილურობაა და ეს ბოლო რამდენიმე რბოლაში მაქსისგან კარგად ჩანს.“ - განაცხადა ლეგენდარულმა ბრიტანელმა პილოტმა.

რამდენიმე გრან პრის წინ მაქსსა და ოსკარს შორის სხვაობა 104 ქულა იყო, ახლა კი ნიდერლანდელმა სხვაობა 40 ქულამდე შეამცირა. 2025 წლის სეზონის დასრულებამდე 5 გრან პრი დარჩა. მექსიკის გრან პრი 24-26 ოქტომბერს გაიმართება.

ვერსტაპენი: "ჩემპიონობისთვის ბრძოლაში აუცილებელია სრულყოფილი უიქენდების შენარჩუნება"