ვენგერმა გერმანიის ნაკრების მთავარი ტკივილი დაასახელა

არსენ ვენგერმა სერიოზული ეჭვი გამოთქვა იმის შესახებ, რომ იურგენ კლოპის მოსვლა გერმანიის ნაკრების ღრმა კრიზისს უცებ უშველის.

არსენალის ლეგენდარული ფრანგი მწვრთნელი მიიჩნევს, რომ გერმანული ფეხბურთის პრობლემები ბევრად უფრო სერიოზულია, ვიდრე უბრალოდ ის, თუ ვინ ზის სათადარიგოთა სკამზე.

ტონი კროოსის პოდკასტში Einfach mal Luppen ვენგერმა განაცხადა:

კლოპის სახელი გერმანიას უბრუნებს იმედს, რომ უმაღლეს დონეს მიაღწევს, მაგრამ შეცვლის თუ არა ეს ყველაფერს, არ ვარ დარწმუნებული. გერმანიაში ბევრად უფრო დიდი პრობლემები გაქვთ. არ ვიცი, შეძლებს თუ არა ის მარტო ამის მოგვარებას. კლოპი ჭკვიანი კაცია და ეს თავადაც იცის

საკუთარი სიტყვების დასამტკიცებლად ვენგერმა სამხრეთ ამერიკის მაგალითი მოიყვანა, სადაც კარლო ანჩელოტის მოსვლის მიუხედავად, ბრაზილიის ნაკრები მუნდიალის მერვედფინალში ნორვეგიასთან (1:2) მაინც სამარცხვინოდ გამოვარდა:

კლოპის კლასში ეჭვი არავის ეპარება, მაგრამ აგერ, ბრაზილიაში ნახეთ: მათ კარლო ანჩელოტი მიუყვანეს, თუმცა ფეხბურთელები იგივე დარჩნენ. კარგ მოთამაშეებს სჭირდებათ დიდი მწვრთნელი, დიდ მწვრთნელებს კი, კარგი მოთამაშეები. ორივე ერთად არის საჭირო

ვენგერმა გერმანიის ნაკრების მთავარ პრობლემად უმაღლესი დონის ცენტრფორვარდის არარსებობა დაასახელა და აღნიშნა, რომ ნაგელსმანს ტურნირზე უხეში შეცდომები არ დაუშვია, გუნდს უბრალოდ ჰარი კეინისნაირი კლინიკური დამგვრებელი აკლია, რომელიც გადამწყვეტ მომენტში გოლს გაიტანს.