VIDEO: 2 მატჩი 21 საათში - შენგელიამ ბარსაში ითამაშა და ნაკრებში გამოემგზავრა

საქართველოს ნაკრების შეკრებაზე გამომგზავრების წინა საღამოს, თორნიკე შენგელიამ ბარსელონას რიგებში ევროლიგის მატჩი ჩაატარა და პარკეტზე ერთ-ერთი საუკეთესო იყო. მისმა გუნდმა ლიონს 10-ქულიანი სხვაობით მოუგო - 88:78.

თოკომ 21:10 წუთი ითამაშა და საკუთარ გუნდს 15 ქულა და 6 მოხსნა შესძინა. 12-დან 5 ორქულიანი და 5-დან 5 საჯარიმო ჩააგდო. მისმა ეფექტიანობის ინდექსმა 12 შეადგინა.

13 ტურის შემდეგ, ბარსას 8 მოგება აქვს და ცხრილის მე-9 პოზიციაზე იმყოფება, თუმცა ლიდერებთან სხვაობა მხოლოდ 1 მოგებაა.

კატალონიელები შემდეგ ტურში, 5 დეკემბერს, სწორედ ერთ-ერთ თანალიდერ ცრვენა ზვეზდას სტუმრად შეხვდებიან.

ცალკე კიდევ ერთხელ აღსანიშნავია, რომ მატჩის დასრულების შემდეგ თორნიკე საქართველოს ნაკრებში გამოემგზავრა და ისე გამოდის, რომ 21 საათისა და 30 წუთის ინტერვალით ორ თამაშს ჩაატარებს.