VIDEO: ასისტი სადებიუტო მატჩში - ლობჟანიძემ სოლტ ლეიკში პირველად ითამაშა

საბა ლობჟანიძემ ახალ კლუბ რეალ სოლტ ლეიკში ოფიციალური დებიუტი საგოლე პასით აღნიშნა.

MLS-ის რეგულარული სეზონის თავისთვის მე-15 მატჩში, იუტელებმა ლოს ანჯელესთან სტუმრად ითამაშეს და 1:3 დამარცხდნენ. 

ქართველი შემტევი თამაშში 78-ე წუთიდან ჩაერთო, 8 წუთში კი მის მიერ მოწოდებულ კუთხურს ლუკას ენჯელის გოლი მოჰყვა - სოლტ ლეიკი იმ დროისთვის 0:3-ს აგებდა და საბოლოო ანგარიში დაფიქსირდა.

საბა იუტელებს ივლისის დასაწყისში შეუერთდა და აქამდე მხოლოდ ერთ ამხანაგურ შეხვედრაში ჰქონდა მონაწილეობა მიღებული - ინგლისურ ბარნლისთან ბოლო 19 წუთი გაატარა მოედანზე.

ლობჟანიძის გუნდს 15 ტურში 26 ქულა აქვს, მე-4 პოზიციაზეა და მესამეადგილოსან იმავე ლოს ანჯელესს უკვე 4 ქულით ჩამორჩება, ლიდერ ვანკუვერ ვაითქეფსთან სხვაობა კი 6 ქულაა.

რეალ სოლტ ლეიკი 2004 წელს დაარსდა და ჯერჯერობით ერთადერთი დიდი ტიტული აქვს მოგებული - 2009 წლის MLS-ის თასი.